Sɛgɛsɛgɛlikɛla 12
Maana 38nan
Sɛgɛsɛgɛlikɛla 12
JIRIDEN minnu bɛ cɛw bolo, e ka olu lajɛ. E k’a lajɛ rezɛn tusuu kelen ka bon cogo min na! Cɛ fila de y’a ta ni bere ye. E ka torodenw ni gerenatiw lajɛ. Nin jiriden ɲumanw bɔra min? U bɔra Kanan jamana de la. I hakili b’a la ko Ibrahima ani Isaka ani Yakuba tun sigira Kanan jamana na ka tɛmɛ wa? Ikomi kɔngɔ tun bɛ o jamana na, Yakuba ni a ka denbaya bɔra yen ka taa sigi Misira. San 216 ɲɔgɔn tɛmɛnen kɔ Misira jamana na, Musa bɛ ka Israɛlkaw ɲɛminɛ sisan, walisa ka segin Kanan. U nana se kungokolon yɔrɔ dɔ la min bɛ wele ko Kadɛs.
Kanankaw tun ka jugu. O la sa, Musa ye cɛ 12 ci ka taa jamana sɛgɛsɛgɛ. A ko: ‘Aw ka taa a lajɛ ni a mɔgɔw ka ca, ni barika bɛ u la, ani ni sɛnɛ bɛ ɲɛ o yɔrɔ la. Aw kana ɲinɛ ka na ni a jiriden dɔw ye aw bolo.’
O sɛgɛsɛgɛlikɛlaw seginna ka na tuma min na Kadɛs, u y’a fɔ Musa ye ko ‘A jamana ka ɲi kosɛbɛ.’ U nana ni jiriden dɔw ye walisa k’a jira Musa la ko a yɔrɔ ka ɲi tiɲɛ na. Nka, sɛgɛsɛgɛlikɛla 10 y’a fɔ ko: ‘Mɔgɔ minnu bɛ o yɔrɔ la, u ka bon, ani fanga bɛ u la. Ni an ko an b’a ɲini k’u ka jamana minɛ u la, u bɛna an faga.’
Israɛlkaw ye o kumaw mɛn tuma min na, u siranna. U ko: ‘Hali an tun ka sa Misira, walima a ka fisa yɛrɛ an ka sa kungokolon kɔnɔ yan. An bɛɛ na sa kɛlɛ la, ani an musow ni an denw na minɛ ka kɛ jɔnw ye. An ka kuntigi kura sigi Musa nɔ na, ka segin Misira!’
Nka, sɛgɛsɛgɛlikɛlaw cɛ la, fila y’a jira ko u dalen bɛ Jehova la. U y’a ɲini ka jama dusu mada. O sɛgɛsɛgɛlikɛlaw tun tɔgɔ ye ko Josue ani Kalɛb. O cɛ fila ko: ‘Aw kana siran, Jehova bɛna an dɛmɛ. Dugukolo minɛni bɛna nɔgɔya an bolo.’ Nka, mɔgɔw ma sɔn k’u lamɛn. U tun b’a fɛ ka Josue ni Kalɛb faga yɛrɛ.
O ko ye Jehova dusu bɔ kosɛbɛ. A y’a fɔ Musa ye ko: ‘Mɔgɔ o mɔgɔ si bɛ san 20 na, ani ka yɛlɛn o sanfɛ, o mɔgɔ si tɛna don Kanan jamana kɔnɔ. Ne ye kabako minnu kɛ Misira ani kungokolon kɔnɔ, u ye olu ye, nka, halisa, u ma da ne la. O kosɔn, u bɛna yaala-yaala kungokolon kɔnɔ san 40, fo o mɔgɔw bɛɛ ka sa. Josue ni Kalɛb dɔrɔn na don Kanan jamana na.’
Nɔnburuw 13:1-33; 14:1-38.
