HI mi hna nih an rak put mi thingthei hi zoh tuah u. Khi mitsur tlai bor khi zeitluk in dah a ngan zoh hmanh u. Lang in minung pahnih nih put khim in a rit. Cun theipi le taleti hna zong hi zoh hmanh u. Hi aa dawh mi thingthei hna cu khuazei i a chuak mi dah an si? Kanaan ram in a chuak mi an si. Kanaan ram cu Abraham, Isak le Jakob an rak um bal nak hmun a si ti kha philh hlah u law. Sihmanhsehlaw cuka ah cun mangṭam a rak tlun caah Jakob cu a innchungkhar dihlak he Izipt ram ah aa rak i ṭhial. Khi hnu kum 216 ah Moses nih Israel mi hna cu Kanaan ram ah a rak hruai ṭhan hna. Cun Israel mi hna cu Kadesh an ti mi hmun pakhat kha an rak phan.

Kanaan ram ah cun mi ṭhalo an rak um. Cucaah Moses nih mingiatu 12 a rak thlah hna i; ‘Khika ram ah minung zeizat dah an um i zei tluk ṭhawng mi dah an si ti va ngia tuah u. A vawlei cu thlaici cin nak ah a ṭha hnga maw ti zong va zoh tuah u. Cun a chung in a chuak mi thingthei cheukhat zong rak chuahpi hrimhrim u,’ a ti hna.

Mingiatu hna cu Kadesh i an rak phanh ṭhan tik ah Moses sin ah cun: ‘A ṭha taktak mi ram pakhat a si ko,’ tiah an chimh. A ṭhatnak fian ter awk ah a thingthei cheu khat kha Moses cu an hmuhsak. Asinain mingiatu 10 nih cun: ‘Khika i a um mi minung hna cu an ngan ngai ngai i an ṭhawng ngaingai. An ram lak awk kan i zuam ah cun an kan thah dih ko lai,’ tiah an ti.

Israel mi hna cu khi bia an theih tik ah an ṭih ngaingai. ‘Izipt ram ah maw hika ramcar chung ah hin maw thi u sih law a ṭha deuh ko hnga. Ral tuknak chung ah kan thi dih lai i kan nupile le kan fale cu tlaih an si dih ko cang lai. Cucaah Moses zaka ah hin hruaitu thar pakhat thim u sih law Izipt ram ah cun kir ṭhan ko u sih!’ an ti.

Sihmanhsehlaw mingiatu pahnih nih cun Jehovah kha an i bochan i, mi hna kha daih ter awk an zuam hna. An min cu Joshua le Kaleb an si. Annih nih cun: ‘Ṭih hlah u. Jehovah cu kan sin ah a um ko. Ram cu fawi tein kan lak khawh ko lai,’ tiah an ti hna. Sihmanhsehlaw mi hna nih cun an ngai hna lo. Joshua le Kaleb hmanh kha thah an rak duh hna.

Cucaah Jehovah cu a thin a rak hung ngaingai i, Moses sin ah: ‘Mi hna lak i kum 20 le a cunglei vialte cu Kanaan ram chung ah an lut kho lai lo. Izipt ram le ramcar chung i ka rak tuah mi khuaruahharnak vialte an hmuh dih ko cang nain atu tiang keimah kha an ka zum kho rih lo. Cucaah hmanung bik mi a thih hlan tiang ramcar chung ah kum 40 chung an vai lai. Joshua le Kaleb lawnglawng Kanaan ram chung ah cun an lut lai,’ tiah a rak chimh.