GET sa bann fri ki sa bann zonm pe anmennen. Gete konman sa grap rezen i gro. De zonm i bezwen anmenn li lo en bar dibwa. E get bann fig ek bann grenad. Kote ki tou sa bann zoli fri i sorti? An Kanaan. Mazinen, Kanaan ti sa pei kot Abraam, Izaak ek Zakob ti’n deza viv. Me akoz ti annan lafamin laba, Zakob ek son fanmiy ti al Lezip. Aprezan, apepre 216 lannen plitar, Moiz ti pe anmenn bann Izraelit an Kanaan. Zot ti’n ariv dan en landrwa dan dezer ki ti apel Kades.

Bann move dimoun ti pe reste an Kanaan. Alor Moiz ti anvoy 12 espyon, e i ti dir zot: ‘Rode ki kantite dimoun ki viv la, e gete si zot for. Gete si later i bon pour plant bann keksoz. E fer sir zot anmenn serten fri.’

Kan bann espyon ti retournen sorti Kades, zot ti rakont Moiz: ‘I vreman en bon pei.’ E pour prouve, zot montre Moiz serten fri. Me 10 sa bann espyon i dir: ‘Bann dimoun ki reste la, zot gro e zot for. Nou pou ganny touye si nou esey pran sa pei.’

Bann Izraelit ti per kan zot ti antann sa. ‘Ti pou pli bon mor an Lezip oubyen menm dan dezer,’ zot ti dir. ‘Nou pou mor dan lager, e nou madanm ek nou zanfan pou ganny kaptire. Annou swazir en nouvo sef dan plas Moiz, e nou a retourn Lezip!’

Me de espyon ti met konfyans dan Zeova, e zot ti esey kalme bann dimoun. Zot ti apel Zozye ek Kaleb. Zot ti dir: ‘Pa per. Zeova i avek nou. I pou fasil pour pran sa pei.’ Me bann dimoun pa ti ekoute. Zot ti menm oule touy Zozye ek Kaleb.

Sa ti fer Zeova vreman ankoler, e i ti dir avek Moiz: ‘Napa enn bann dimoun depi laz 20 an e plis ki pou antre dan sa pei Kanaan. Zot in vwar bann mirak ki mon’n fer an Lezip e dan dezer, me zot kontinyen pa met konfyans dan mwan. Alor zot pou trennen dan dezer pour 40 an ziska ki dernyen dimoun i mor. Se selman Zozye ek Kaleb ki pou antre dan pei Kanaan.’