A FILƐ cɛɛ nunu nana ni yiriden minw ye. Ɛrɛzɛn tusun ni toro ani gerenadi nunu filɛ u ka bonbon cogo min na. Cɛɛ kelen tɛ se k’u ta fɔɔ cɛɛ fila. O yiriden ɲuman nunu bɔra min do? Kanaan jamana na. I hakili b’a la ko Ibrahima, Isiyaka ani Yakuba sigira ka ye Kanaan jamana na wa? Nka, kɔngɔba dɔ y’a to Yakuba n’a somɔgɔw tagara sigi Misira. Sisan saan 216 tɛmɛnin kɔ, Musa ye Israɛldenw ɲɛminɛ ka segi ka na Kanaan jamana na. U filɛ sisan kongokolon kɔnɔ, yɔrɔ min be weele ko Kadɛsi.

Kanankaw tun ye mɔgɔ juguw ye. O kama, Musa ye kolajɛbaga mɔgɔ 12 ci k’a fɔ u ye ko: ‘Aw ye taga a filɛ n’o jamana kɔnɔ mɔgɔw ka ca ani n’u barika ka bon. Aw ye dugukolo filɛ ni sɛnɛfɛnw be ɲɛ a kan. Aw ka jija ka na ni jamana nin kɔnɔ yiriden dɔw ye.’

Kolajɛbagaw segira ka na Kadɛsi tuma min na, u y’a fɔ Musa ye ko: ‘Tiɲɛn na jamana nin ka ɲi. A yiriden dɔw filɛ.’ Nka, kolajɛbaga mɔgɔ 10 y’a fɔ ko: ‘Mɔgɔjanjan barikamanw lo be o jamana kɔnɔ. U bena an faga n’an y’a ɲini ka jamana nin minɛ.’

O kuma ye siranya bila Israɛldenw na. U y’a fɔ ko: ‘Ni an tun sara Misira walima kongokolon nin kɔnɔ yan, o tun ka fisa. U bena an faga kɛlɛ la k’an musow n’an deenw cɛ ka taga n’u ye. An ka kuntigi wɛrɛ sigi Musa nɔɔ na, ani ka kɔsegi Misira!’

Nka, kolajɛbaga mɔgɔ fila y’u jigi la Jehova kan ani u y’a ɲini ka jama dusu suman. U tɔgɔw ko Zozuwe ani Kalɛbu. U ko: ‘Aw kana siran. Jehova be n’an ye. O jamana minɛko tɛna gwɛlɛya.’ Nka, jama ma mɛnni kɛ. U yɛrɛ tun b’a fɛ ka Zozuwe ni Kalɛbu faga.

O ye Jehova dusu dimi kosɔbɛ, ani a y’a fɔ Musa ye ko: ‘Minw bɛɛ sii sera saan mugan ma fɔɔ ka tɛmɛ o kan, olu si tɛna don Kanaan jamana kɔnɔ. Ne ye kabako minw kɛ Misira ani kongokolon kɔnɔ, u ɲɛɛ lara u kan, nka u bele ma la ne la. O kama, u bena yaalayaala kongokolon kɔnɔ saan 40 fɔɔ u bɛɛ ka sa. Zozuwe ni Kalɛbu dɔrɔn lo bena don Kanaan jamana kɔnɔ.’