Ozohoze 12
EHUNGI 38
Ozohoze 12
TARA kovihape ovarumendu imba mbi va tjindi. Tara omandjembere nga pu ye ṱa. Mape hepa ovarumendu vevari okuyetjinda kotjiti. Nu tara komakuyu nozondenya. Ovihape oviwa mbi vya zira pi? Ovyo vya zira kehi raKanaan. Zemburuka kutja mu Kanaan omu mwa turire Abraham, Isak na Jakob. Nungwari mena rourumbu mbwa ri ngo, Jakob neṱundu re va tjindirire koEngipte. Kombunda yozombura ape 216, Moses wa hongorera Ovaisrael okuyaruka ku Kanaan. Owo ve ya poruveze mokuti onguza ndu isanewa kutja Kades.
Mehi raKanaan mwa turire ovandu ovavi. Okutja Moses wa hinda ozohoze 12, na tja ku wo: ‘Kakonḓononeye kutja ovandu mba tura mehi ndo ivengapi nokutja ovanamasa pupe ṱa pi. Konḓononeye kutja ehi ewa okukuna mo. Nu kondjeye okueterera ovihape tjiva vyehi ndo.’
Indu ozohoze tji za kotoka koKades, za raera Moses: ‘Oro tjiri ehi ewa.’ Nu okuraisira Moses kutja ouatjiri, owo ve mu raisira tjiva vyovihape. Nungwari ozohoze inḓa 10 za tja: ‘Otjiwaṋa tji tja tura mehi ndo otjinene nu otjinamasa. Eṱe matu kaṱa tji twa kondjisa okuhuura ehi ndo.’
Ovaisrael va tirire tji va zuvire mbi. Owo arire tji va tja: ‘Atja rira kokuwa andakuzu twa ṱira mehi raEngipte poo imwi mokuti onguza. Eṱe matu ṱu movita, novakazendu novanatje vetu mave huurwa. Ngatu ritoororere omunane omupe moruveze rwaMoses nu tu yaruke koEngipte!’
Nungwari ozohoze inḓa mbari za ri nongamburiro mu Jehova, nu va kondjisa okuwisa omitima vyovandu pehi. Omana wawo ya ri Josua na Kaleb. Owo va tjere: ‘Amu tira ko. Jehova u ri puna eṱe. Ma rire oupupu okuhuura ehi ndo.’ Nungwari otjiwaṋa katji puratenene ko. Nu owo aave vanga okuzepa Josua na Kaleb.
Ihi tja pindikisa Jehova tjinene neye arire tja tja ku Moses: ‘Kape na umwe wotjiwondo tjozombura 20 nokomurungu wanao, ngu ma hiti mehi raKanaan. Owo va muna ovihimise mbi mba tjitira moEngipte na mokuti onguza, nu ngunda kave nongamburiro mu ami. Okutja mave takauka mokuti onguza oure wozombura 40, nga auhe weṋu tja koka. Josua na Kaleb aveyerike ombu mave kahita mehi raKanaan.’
