Tnac n yexbaṛǧiyen
TAQSIṬ TIS 38
Tnac n yexbaṛǧiyen
MUQEL lfakyat i refden yergazen-agi. Wali acḥal meqqer uyazi-yagi n waḍil (ugazu-yagi n tẓurin). Laqen sin yergazen iwakken a t-refden s umextaf. Wali daɣen tibexsisin-agi akk-d ṛṛemman. Ansi i d-kkant lfakyat-agi icebḥen? Si tmurt n Kanɛan. Tecfiḍ ɣef Kanɛan? Ţ-ţamurt-nni anda ɛacen zik Abṛaham, Isḥaq d Yeɛqub. Lameɛna asmi i d-yeɣli laẓ ɣef tmurt, Yeɛqub ţ-ţwacult-is unagen ɣer tmurt n Maṣer. Tura mi ɛeddan 216 iseggasen, Musa yezwar zdat n wegdud n Isṛayil akken a t-yerr ɣer tmurt n Kanɛan. Aql-aten tura deg yiwen wemḍiq deg uneẓruf yeţţusemman Qadic.
Imezdaɣ n tmurt n Kanɛan d imcumen. Ɣef wayagi i gceggeɛ Musa 12 n yexbaṛǧiyen ɣer dinna, yenna-yasen: ‘Walit ma deg waṭas yid-sen i llan yerna ma ǧehden neɣ ala. Muqlet daɣen akal-nsen ma d win i d-iţţaken lɣella. Ɣur-wat aţ-ţeqqimem ur d-teţţawim ara kra n lfakyat.’
Mi d-uɣalen yexbaṛǧiyen-nni ɣer Qadic, nnan i Musa: ‘Ţ-ţideţ, ţ-ţamurt tamelḥant.’ Akken a d-fken ţţbut, sseknen i Musa kra n lfakyat. Lameɛna ɛecṛa seg yexbaṛǧiyen-nni nnan: ‘Agdud izedɣen dinna meqqer yerna yeǧhed s waṭas. A ɣ-nɣen ma neɛreḍ a d-nḥeṛṛ tamurt-nsen.’
Mi slan wat Isṛayil i wannect-agi, ikcem-iten lxuf, dɣa nnan: ‘Xiṛ lemmer nemmut di Maṣer neɣ dagi deg uneẓruf. A ɣ-nɣen di lgirra yerna tilawin-nneɣ d warraw-nneɣ ad uɣalen d imeḥbas-nsen. Eyyaw a nextiṛ win ara yuɣalen d aqerru fell-aneɣ deg wemkan n Musa, imiren a nuɣalet ɣer Maṣer!’
Lameɛna sin seg yexbaṛǧiyen-nni ţeklen di Yahwa, ɛerḍen a d-rren agdud ɣer leɛqel-is. Ismawen-nsen Yacuɛa d Kalib. Nnan: ‘Ur ţţagadet ara. Yahwa yella yid-nneɣ. A sen-nekkes tamurt am wulac.’ Lameɛna At Isṛayil ur ḥessen ara. Bɣan ula ţ-ţimenɣiwt ad nɣen Yacuɛa akk-d Kalib.
Annect-agi yesserfa Yahwa ayendin. Yenna ihi i Musa: ‘Ula d yiwen seg wid akk yesɛan si 20 iseggasen d asawen ur ikeččem ɣer tmurt n Kanɛan. Walan lbeṛhanat i xedmeɣ ama di Maṣer ama deg uneẓruf, lameɛna mazal-iten ur ţeklen ara fell-i. Ɣef waya ad mmenṭaren deg uneẓruf 40 iseggasen alamma yemmut uneggaru seg-sen. Ala Yacuɛa akk-d Kalib ara ikecmen ɣer tmurt n Kanɛan.’
