NDAI masha ni hpai wa ai namsi ni hpe yu dat mu. Asi sumbaw ai tsabyi lakung langai mi, kade daram kaba ai hpe yu yu mu. Masha lahkawng shingtau nna, hpai wa ai. Sabyin si hte, Maihpang si hpe mung yu yu mu. Ndai daram tsawm ai namsi gara kaw na sa la wa ma ni? Hkanan mung kaw na re. Hkanan mung kaw e, Abraham, Isek hte, Yaku ni moi kalang mi nga lai wa ma ai hpe naw myit dum na re. Raitimung dai mung hta hku wa kaba du wa ai majaw, Yaku gaw shi a nta masha ni hte Egutu mung de htawt sa wa ma ai. Shaning 216 ning daram na ai hpang Mawshe gaw Israela masha ni hpe Hkanan mung de bai woi shaga sa wa ai. Israela masha ni Ka-de-sha ngu ai nam mali e du nga masai.

Hkanan mung hta e, nhkru ai masha ni nga nga ma ai. Dai majaw Mawshe gaw kin-yu 12 hpe shangun dat ai: ‘Dai mung hta masha kade daram nga ma ai hte, kade daram n-gun ja ma ai lam sa yu shangun ai. Nai mam hkai na matu, ga sau kaja n kaja ai hpe sa yu wa mu. Bai nhtang wa ai shaloi, namsi nkau mi la wa mu,’ nga nna htet dat ai.

Kin-yu ni mung Ka-de-sha de bai nhtang du wa ma ai shaloi, Mawshe hpe wa tsun dan ma ai: ‘Grai kaja ai mungdan re da.’ Mawshe hpe namsi nkau mi wa madun dan ma ai. Raitimung kin yu marai 10 ni gaw: ‘Dai mung hta nga ai masha ni gaw n-gun atsam kaba ma ai. Dai mung hpe madu la na matu shakut yang anhte si mat ma na re,’ nga nna wa tsun ma ai.

Dai ga hpe Israela masha ni na ma ai shaloi, hkrit mat ma ai. ‘Egutu mung hta e shing nrai ndai nam namli e si mat yang pyi kaja na re nga ma ai. Majan hta anhte si mat ma na re, anhte a madu jan ni hte, anhte a kashu kasha ni mung rim la ai hkrum na re, Mawshe a malai kaga ningbaw langai mi lata la nna, Egutu mung de bai nhtang wa mat saga!’ nga nna tsun ma ai.

Raitimung kin-yu lahkawng gaw Yehowa hpe kamhpa ma ai. Masha ni a myit hpe jasim ya ma ai. Shan lahkawng a mying gaw Yawshu hte Hkaleb rai ma ai. Shan tsun ai gaw: ‘Hkum hkrit mu; Yehowa anhte hte rau rai nga ai; mungdan hpe aloi sha madu la lu na re,’ nga ma ai. Raitimung masha ni gaw nmadat ma ai. Yawshu hte Hkaleb hpe pyi sat kau mayu wa ma ai.

Dai re ai majaw Yehowa grai masin pawt nna: ‘Asak 20 ning na lahta na ni kadai mung Hkanan mung hta shang lu na ma ai nrai; Egutu mung hte nam mali e ngai madun dan ai lamik kumla ni hpe mu nga ning len, ya du hkra ngai hpe n kam hpa ma ai; dai majaw hpang jahtum langai mi mung nngam si ai du hkra nam mali e, 40 ning kawan hkawm ra na myit dai; Yawshu hte hkleb chyu sha Hkanan mung de shang lu na re,’ nga nna Mawshe hpe tsun ai.