CHAAWIL ruhebʼ li awimq. Kʼajoʼ xnimal xchiijilal li uubʼ! Joʼkan naq ebʼ li winq yookebʼ xpaqonkil li uubʼ rikʼin jun li cheʼ. Chaawil ajwiʼ ebʼ li iig ut ebʼ li kranadiiy. Bʼar keʼxkʼam chaq ru li awimq aʼin? Kʼexkʼam chaq saʼ li tenamit Canaan. Ma jultik aawe naq Canaan keʼwank chaq laj Abrahan, laj Isaac ut laj Jacob. Abʼan naq kiwank li weʼej, laj Jacob ut li xjunkabʼal kohebʼ Egipto. Ebʼ laj Israel toj wankebʼ saʼ li chaqichʼochʼ saʼ li naʼajej Qades. Kinumeʼk 216 chihabʼ naq laj Moises ut ebʼ laj Israel keʼsutqʼiik saʼ li tenamit Canaan.

Ebʼ li wankebʼ Canaan maaʼusebʼ xnaʼlebʼ. Joʼkan naq laj Moises kixtaqla 12 chi winq ut kixye rehebʼ: ‹Cheerilaq chaq jarubʼebʼ wankebʼ Canaan ut ma kawebʼ ribʼ. Teeril ma us li chʼochʼ re awk ut teekʼam chaq junjunq ru li awinq›.

Naq keʼsutqʼiik chaq ebʼ li winq, keʼxye re laj Moises: ‹Chaabʼil li chʼochʼ wank Canaan›. Joʼkan naq keʼxkʼam chaq ru li awimq re naq teʼpaabʼaaq rehebʼ. Abʼan 10 rehebʼ li winq aʼin keʼxye: ‹Li wankebʼ Canaan jwal nimebʼ ut kawebʼ ribʼ. Wi tqamaqʼ li tenamit chiruhebʼ, tooʼexkamsi›.

Ebʼ laj Israel keʼxxuwak naq keʼrabʼi aʼin ut keʼxye: ‹Us raj xookam Egipto malaj saʼ li chaqichʼochʼ aʼin! Anaqwan tookamq saʼ li yalok. Ebʼ li qixaqil ut ebʼ li qakokʼal teʼkʼameʼq choʼq moos Canaan. Joʼkan naq qasikʼaq reqaj laj Moises ut sutqʼiiqo Egipto!›

Abʼan wiibʼ rehebʼ li winq aʼin, laj Josue ut laj Caleb, kʼojkʼookebʼ xchʼool rikʼin li Jehobʼa. Joʼkan naq keʼxyal xwaklesinkil xchʼool li tenamit ut keʼxye: ‹Mexxuwak, li Jehobʼa wank qikʼin. Moko chʼaʼaj ta reechaninkil li tenamit!› Abʼan li tenamit inkʼaʼ kiraj rabʼinkil aʼin ut keʼraj xkamsinkil laj Josue ut laj Caleb.

Joʼkan naq kichalk xjosqʼil li Jehobʼa ut kixye re laj Moises: ‹Maajun rehebʼ li wank junmay chihabʼ re malaj naxqʼax junmay t-ok saʼ li tenamit Canaan. Usta keʼril li sachbʼachʼoolej kinbʼaanu Egipto ut saʼ li chaqichʼochʼ, toj maajiʼ nekeʼxkʼojobʼ xchʼool chiwu. Joʼkan naq teʼxbʼeeni ribʼ saʼ li chaqichʼochʼ chiru 40 chihabʼ toj reetal teʼkamq. Kaʼajwiʼ laj Josue ut laj Caleb teʼoq Canaan›.