AKIMONA bipangwa byasenda babe bantu. Akimona kizanze kya miñanzañanza byo kyabaya. Bantu babiji bo bakonsha kwikitembakena pa kichi. Kabiji akitala mikuyu ne mapomegulanchi. Nga bino bipangwa byawama bibye byafumine pi? Byafumine mu ntanda ya Kenana. Vuluka kuba’mba Kenana yo mpunzha ko baikalanga patanshi ba Abalahama, Izaka ne Yakoba. Bino na mambo a kipowe kya nzala, Yakoba ne kisemi kyanji bavilukijile ku Ijipita. Bino byo papichile myaka nobe 216, Mosesa watangijile bena Isalela kubwela ku Kenana. Bafikile ku mpunzha ya mu kiselebwa itelwa’mba Kadeshi.

Bantu batama baikalanga mu ntanda ya Kenana. Onkao mambo, Mosesa watumine bamwendela ntanda 12, ne kwibambila’mba: ‘Mukamone bantu bekalamo, kana bakosa. Mukamone ntanda kana mushiji ujiko wafuka wa kujimamo bintu. Kabiji mukasendepo bipangwa bimo.’

Aba bamwendela ntanda byo babwelele ku Kadeshi, bamwambijile Mosesa amba: ‘Ke kyalo kyawama bingi.’ Kabiji pa kuba’mba bamweshe’mba byo baambilenga byajinga bya kine, bamumwesheshe Mosesa bipangwa bimo. Bino bamwendela ntanda jikumi baambile’mba: ‘Bantu bekalamo babaya ne kukosa. Baketwipaya umvwe tukobe’mba twangate ntanda.’

Bena Isalela bachiine byo baumvwine bino. Baambile’mba: ‘Kyakonsheshe kuwama umvwe twafwijile mu ntanda ya Ijipita nangwa inge twafwijile muno mu kiselebwa. Baketwipaya ku mpoko, kabiji bakazhi betu ne baana betu bakebanonka buzha. Twisalulwile atwe bene ntangi wetu mu kifulo kya Mosesa, tubwele ku Ijipita!’

Bino bamwendela ntanda babiji baketekejile mwi Yehoba, ne kweseka kubwezhamo bantu michima. Mazhina abo bajinga ba Yoshua ne Kaleba. Baambile’mba: ‘Kuchina ne. Yehoba tuji nanji. Uketutwezha mu ino ntanda.’ Bino bantu kechi baumvwine ne. Bakebele ne kwipaya ba Yoshua ne Kaleba.

Kino kyazhingijishe bingi Yehoba, kabiji waambijile Mosesa amba: ‘Kafwako nangwa umo wa mu boba bantu kutendeka na wa myaka ya kusemwa 20 kuya peulu ukatwela mu ntanda ya Kenana ne. Bamwene byakukumya byonse byo naubile mu Ijipita ne mu kiselebwa, bino kechi banketekela ne. Onkao mambo balulumbangatu mu kiselebwa pa myaka 40 kufikatu ne kimye kikafwa muntu ukapelako. Yoshua ne Kaleba bo bonka bakafika mu ntanda ya Kenana.’ Kubala 13:1-33; 14:1-38.