LUK di frut dɛn we dɛn man ya put na dɛn sholda. Luk aw dɛn big big. Na in mek na tu man dɛn put am na dɛn sholda. Usay dɛn pul dɛn fayn fayn frut ya? Na Kenan dɛn pul dɛn. Mɛmba se, na Kenan Ebraam, Ayzak ɛn Jekɔb bin de fɔs. Na bikɔs plɛnti tin fɔ it nɔ bin de na Kenan, na in mek Jekɔb ɛn in famili go de na Ijipt. Na lɛk 216 ia so dɔn pas frɔm di tɛm we Jekɔb ɛn in famili go de na Ijipt. Naw, Mozis de kɛr di Izrɛlayt dɛn go bak na Kenan. Dɛn dɔn kam fɔs na wan ples na di ɛmti land usay pɔsin nɔ go ebul de. Dɛn kɔl dis ples ya Kedɛsh.

Na bad pipul dɛn de na Kenan. So Mozis sɛn 12 man dɛn fɔ go luk aw Kenan tan. I tɛl dɛn se: ‘Una go luk ɔmɔs pipul dɛn de de, ɛn if dɛn gɛt trɛnk. Una luk if di land fayn fɔ plant. Ɛn una kam wit sɔm pan di frut dɛn we de gro de.’

We di man dɛn we Mozis sɛn kam bak na Kedɛsh, dɛn tɛl am se: ‘Di kɔntri na fayn ples.’ So fɔ sho se di ples fayn, dɛn kam wit sɔm pan di frut dɛn we de gro de. Bɔt tɛn pan di man dɛn we dɛn sɛn, kam tɔk se: ‘Di pipul dɛn we de de tɔl tɔl ɛn dɛn gɛt trɛnk. Dɛn go kil wi if wi tray fɔ pul di land na dɛn an.’

Di Izrɛlayt dɛn fred we dɛn yɛri dis. So dɛn se: ‘I bin fɔ bɛtɛ if wi fɔ dɔn day na Ijipt, ɔ i go bɛtɛ sɛf if wi day naya. If wi go fɛt dɛn, dɛn go kil wi, ɛn dɛn go ol wi wɛf ɛn wi pikin dɛn. Una lɛ wi pul Mozis ɛn pik nyu lida, ɛn lɛ wi go bak na Ijipt.’

Bɔt tu pan di man dɛn we dɛn sɛn, abop pan Jiova, so dɛn tɔk fayn to di pipul dɛn. Dɛn nem dɛn na Jɔshwa ɛn Kelɛb. Dɛn tɛl di pipul dɛn se: ‘Una nɔ fred. Jiova de wit wi. I nɔ go at fɔ pul di land na di pipul dɛn an.’ Bɔt di pipul dɛn nɔ lisin to dɛn. Dɛn bin ivin want fɔ kil Jɔshwa ɛn Kelɛb.

Dis mek Jiova vɛks bad bad wan, so i tɛl Mozis se: ‘Ɔl di wan dɛn we ol frɔm 20 ia te go ɔp, nɔ go go na Kenan. Dɛn dɔn si di mirekul dɛn we a du fɔ dɛn na Ijipt ɛn na dis ples, bɔt dɛn nɔ stil biliv mi. So dɛn go waka waka fɔ 40 ia na di ɛmti land usay pɔsin nɔ go ebul de te di las wan pan dɛn day. Na Jɔshwa ɛn Kelɛb nɔmɔ go go na Kenan.’