ပူ ၃၈
ပှၤကွၢ်ခူသူၣ်တၢ် ၁၂ ဂၤ အဂ့ၢ်
ကွၢ်တၤသၣ်တဖၣ်လၢ ပှၤတဖၣ်အံၤ ဟဲက့ၤယိးအီၤန့ၣ်တက့ၢ်. ကွၢ်စပံးကူၤ ဒိၣ်ထဲလဲၣ်န့ၣ်တဘီ. ပှၤခံၤဂၤဘၣ်ဟဲက့ၤယိးလၢ နီၣ်ယိးတဘိန့ၣ်လီၤ. ကွၢ်ကဒီးချၢၣ်ဒၢသၣ်, ဒီးသလဲသၣ်န့ၣ်တဘီ. ဟဲက့ၤမၤန့ၢ်ဝဲသ့ၣ် တၤသၣ်ဃံလၤဒ်အံၤသိးသ့ၣ်တဖၣ် ဖဲလဲၣ်. လၢကီၢ်ကနၤဧၣ်လီၤသၢၣ်. ကီၢ်ကနၤဟၣ်န့ၣ် မ့ၢ်ကီၢ်တဘ့ၣ်လၢ အၤဘြၤဟၣ်, အံၤစဲး, ဒီးယၤကိာ် အိၣ်တ့ၢ်ဝဲအလီၢ်န့ၣ် သုသ့ၣ်နီၣ်ဧါ. ဘၣ်ဆၣ်ဒီး ဖဲန့ၣ် တၢ်သၣ်ဝံၤလီၤဒိအိၣ်ထီၣ်အဃိ ယၤကိာ်ဒီးအပှၤဟံၣ်ဖိဃီဖိတဖၣ် ဘၣ်သုးအလီၢ်ဆူ ကီၢ်အဲၤကူပတူးပူၤန့ၣ်လီၤ. ယံာ်အနံၣ် ၂၁၆ နံၣ်ဝံၤအလီၢ်ခံ မိၤၡ့က့ၤကိးပှၤအံၣ်စရ့လးဖိတဖၣ်ဆူ ကီၢ်ကနၤဧၣ်န့ၣ်လီၤ. အခဲအံၤ ပှၤအံၣ်စရ့လးဖိတဖၣ် တုၤအိၣ်ဝဲသ့ၣ်လၢ ပှၢ်လၢ်ကျါ တၢ်လီၢ်လၢဘၣ်တၢ်ကိးအီၤ ကၤဒ့ၣ်န့ၣ်လီၤ.
လၢကီၢ်ကနၤဧၣ်န့ၣ် ပှၤအၢပှၤသီတဖၣ်အိၣ်ဝဲဒၣ်လီၤ. လၢတၢ်န့ၣ်အဃိ မိၤၡ့ပျၢ်လီၤဝဲဒၣ် ပှၤကွၢ်ခူသူၣ်တၢ် ၁၂ ဂၤ, မၤလိာ်အဝဲသ့ၣ်ဒ်အံၤလီၤ. ‘ဖဲန့ၣ်ပှၤအိၣ်ပှံၤဂၤလဲၣ်, အဝဲသ့ၣ်အဂံၢ်ဆူၣ်ဝဲဆံးဒိၣ်လဲၣ်န့ၣ် ဟဲက့ၤဃုသ့ၣ်ညါတက့ၢ်. ဒီးဃုသ့ၣ်ညါဃုာ် ဟီၣ်ခိၣ်န့ၣ် ဂ့ၤလၢတၢ်သူၣ်တၢ်ဖျးအဂီၢ်ဧါ, ဒီးသုမ့ၢ်ဟဲက့ၤ မ်သုတသးပ့ၤနီၣ် ဟဲက့ၤစိာ် တၤသၣ်တနီၤန့ၣ်တဂ့ၤ.’
ပှၤကွၢ်ခူသူၣ်တၢ်တဖၣ်န့ၣ် ဖဲအဟဲက့ၤတုၤလၢ ကၤဒ့ၣ်အခါ တဲဘၣ်ဝဲမိၤၡ့လၢ ‘မ့ၢ်မးကီၢ်တဘ့ၣ်လၢ အဂ့ၤဝဲနီၢ်နီၢ်န့ၣ်လီၤ.’ လၢတၢ်အုၣ်အသးအဂီၢ် ဒုးနဲၣ်ဝဲတၢ်သၣ်တနီၤန့ၣ်လီၤ. ဘၣ်ဆၣ်သနာ်က့ ပှၤကွၢ်ခူသူၣ်တၢ်အဂၤ ၁၀ တခီ စံးဝဲဒၣ်, ‘ပှၤအိၣ်ဖဲန့ၣ်တဖၣ်န့ၣ် မ့ၢ်ပှၤနီၢ်ဒိၣ်, အဂံၢ်အဘါဆူၣ်, ပမ့ၢ်ဂုာ်ကျဲးစၢးမၤန့ၢ်ကီၢ်သၢပျၢၤ ပကသံလၢာ်လီၤ.’ တုၤပှၤအံၣ်စရ့လးဖိတဖၣ် နၢ်ဟူတၢ်အံၤဒီး, ပျံၤတၢ်လီၤသၢၣ်. အဝဲသ့ၣ်စံးဝဲဒၣ် ‘လၢကီၢ်အဲၤကူပတူးပူၤမ့ၢ်ဂ့ၤ, ဖဲအံၤမ့ၢ်ဂ့ၤ ပမ့ၢ်သံတခီကဂ့ၤဝဲလီၤ. ပကဘၣ်သံလၢတၢ်ဒုးသုးအပူၤလီၤ. ပဖိပမါတဖၣ်စ့ၢ်ကီး တၢ်ကဖီၣ်န့ၢ်အီၤလီၤ. ပကဃုထၢထီၣ် ပှၤအခိၣ်အနၢ်တဂၤ လၢမိၤၡ့အလီၢ်ဝံၤ မ်ပက့ၤသကိးဆူ ကီၢ်အဲၤကူပတူးတက့ၢ်’ န့ၣ်လီၤ.
ဘၣ်ဆၣ်ဒီး, ပှၤကွၢ်ခူသူၣ်တၢ်ခံဂၤတခီ ပာ်ဂံၢ်ပာ်ဘါဒီးနာ်ဝဲယဟိဝၤ, ဒီးမၤအိၣ်ဂၢၢ်က့ၤ ပှၢ်ဂီၢ်မုၢ်အသးန့ၣ်လီၤ. အဝဲသ့ၣ်အမံၤမ့ၢ် ယိၤၡူဒီး ကၤလ့း န့ၣ်လီၤ. စံးဝဲသ့ၣ်လၢ, ‘ပျံၤတၢ်တဂ့ၤ, ယဟိဝၤအိၣ်ဒီးပှၤလီၤ. ကီၢ်အံၤ ပမၤန့ၢ်အီၤညီညီသ့လီၤ.’ ဘၣ်ဆၣ်ဒီး ပှၤတဖၣ်တဒိကနၣ်ဝဲသ့ၣ်ဘၣ်. ကဲထီၣ်ဝဲတုၤဒၣ်လဲာ် အဲၣ်ဒိးမၤသံယိၤၡူဒီးကၤလ့းန့ၣ်လီၤ.
လၢတၢ်န့ၣ်အဃိ ယဟိဝၤအသးထီၣ်ဝဲဒိၣ်ဒိၣ်ကလဲာ် ဒီးစံးဝဲမိၤၡ့ဒ်အံၤ, ‘ပှၤလၢအသးအိၣ် အနံၣ် ၂၀ ဒီးအဖီခိၣ်တဖၣ် တနုာ်လီၤဘၣ်ဆူ ကီၢ်ကနၤဧၣ်အပူၤ နီတဂၤဘၣ်. လၢကီၢ်အဲၤကူပတူး, ဒီးလၢပှၢ်ပူၤန့ၣ် ထံၣ်ဘၣ်ဝဲသ့ၣ် တၢ်စိတၢ်ကမီၤလၢ ယဒုးနဲၣ်အီၤဘၣ်ဆၣ် တုၤအံၤဒၣ်လဲာ်တနာ်ယၤဒံးဘၣ်. လၢတၢ်အံၤအဃိ ကဘၣ်ဟးဝ့ၤဝီၤလၢ ပှၢ်လၢ်ကျါအနံၣ် ၄၀, ဒီးကသံ တုၤပှၤလၢအလီၢ်ခံကတၢၢ် တအိၣ်တ့ၢ်နီတဂၤဘၣ်န့ၣ်လီၤ. ထဲဒၣ် ယိၤၡူဒီးကၤလ့း ကနုာ်လီၤဆူကီၢ်ကနၤဧၣ်အပူၤလီၤ.’