CHÓTSENLALAI tsojmixi xi yʼasí chjota xokjoan. Chótsenlalai kui sikjije énle totsee xi yʼa. Saʼnda jao chjota yʼangʼa kʼoa jngo yá kjiale. Kʼoa chótsenlalai je to higo kʼoa kao je to granada. Jñáni kikʼá to xosí totsjoa kjoan. Ya ʼnde Canaán jaʼaikaoni. A faʼaitsjenli, ya ʼnde jñanáni tjío tsakai je Abraham, Isaac kao Jacob. Tonga kʼianga koanná kjinrá, kʼianá kikao yaniʼyale Jacob ya Egipto. Tonga xi je jao siento kao xjaʼaonjngo nó jaʼato nga kichokatio Egipto, kʼia kikao ijngokʼani Moisés je chjota israelita ya Canaán. Kʼoa ya jña Qadés ʼmi kichokatio ya ʼndekixí.

Nʼio tsʼen chjota xi kisʼe ya Canaán. Kuinga tejao chjota kisikasénsíni Moisés xi kikotsenché jochon, kʼoa kitsole: “Chótsenlao jótjín chjota tjín, kʼoa jókji nganʼio tjínle. Chótsenlao tsa ndachon je nangi tsa koa̱n sʼentje tsojmi. Kʼoa chʼa kʼao tsojmixi xi tjín nga kjuinroao”.

Kʼianga kichoni Qadés je chjota xi tejao, i̱ kitsole Moisés: “Nʼio nda chon ya naxinandá xokji”. Kʼoa nga katamakjainle, tsakakóle tsojmixi xi yʼa. Tonga te mani xi kitso: “Je chjota xi tjín ya nʼio yʼai kjoan kʼoa nʼio taja. Kʼiatsa chjaʼalee naxinandále, sikʼienjinná”.

Kitsokjon je chjota israelita nga kinrʼoé xi tʼatsʼe jebi. Kitso: “Tosala nda tsa ya kʼien ya Egipto kʼoa tsa maije̱ i̱ ʼndekixí”, kʼoa kitsosa: “Kjoajchánjin kuiyájian, kʼoa yánchjínná kao ʼndíxtiná kuindoajin. ¡Kjaʼai chjota chjoéjian xi koasentítjonná ʼndele Moisés, kʼoa tjinñá Egipto!”

Tonga jao mani xi Jeobá kisinʼiotʼa kʼoa tsakatekjáyale naxinandá. Jé Josué kao Caleb. Kitso: “Li nokjonjion. Jeobá tíjnakaoná. Likui ñʼai koa̱nná nga chjoe nangi jebi”. Tonga likui kinrʼoé naxinandá. Saʼnda koanmele kisikʼien Josué kao Caleb.

Nʼio koanjtile Jeobá xi tʼatsʼe jebi, kʼoa kitsole Moisés: “Nijngojinla chjota xi je kan nóle kjoaʼasʼen Canaán. Tsabe jme choa̱ xi tsakakoa ya Egipto kʼoa kao i̱ ʼndekixí tonga tojo tsín sínʼiotʼana. Kuinga ñachan nó kʼoétsomasíni i̱ ʼndekixí saʼnda nga kuiyá ngatsʼi. Toje Josué kao Caleb xi kjoaʼasʼen ya ʼnde Canaán”.