Zistwar 38

Douz Espion

GET sa bann frwi ki sa bann zom-la pe sarye. Get kouma sa grap rezin la gro. Bizin de dimounn pou sarye sa lor enn dibwa. Get sa bann fig ek grenad la. Kot finn gagn sa bann zoli frwi-la? Dan pei Canaan. Rapel, Canaan se sa pei-la mem kot Abraham, Isaac ek Jacob ti viv enn tan. Me parski ti ena lafaminn laba, Jacob ek so fami ti al res l’Égypte. Asterla, anviron 216 lane apre, Moïse pe fer bann Izraelit retourn Canaan. Zot finn ariv Qadesh, dan dezer.

Se bann move dimounn ki res dan pei Canaan. Akoz sa, Moïse avoy 12 espion, ek li dir zot: ‘Al gete komie dimounn res laba, ek ki kantite zot for. Al gete si later bon pou plante. Ek fer sir pou amenn inpe frwi kan zot retourne.’

Kan bann espion retourn Qadesh, zot dir Moïse: ‘Se vremem enn bon pei.’ Ek pou prouv sa, zot montre Moïse de-trwa frwi. Me dis parmi bann espion-la dir: ‘Bann dimounn ki res laba zot gran ek zot for. Bannla pou touy nou si nou rod pran sa pei-la.’

Bann Izraelit gagn per kan zot tann sa. Zot dir: ‘Li ti pou pli bon ki nou ti mor dan l’Égypte ouswa isi mem dan dezer. Nou pou mor dan lager, ek nou fam ek nou zanfan pou vinn prizonie. Anou swazir enn lot sef dan plas Moïse, ek anou retourn l’Égypte!’

Me de parmi bann espion ena konfians an Jéhovah, ek zot esey kalme lepep. Zot apel Josué ek Caleb. Zot dir: ‘Pa bizin gagn per. Jéhovah avek nou. Li pou fasil pou pran sa pei-la.’ Me lepep pa ekoute. Zot mem anvi touy Josué ek Caleb.

Sa fer Jéhovah bien ankoler, ek Li dir Moïse: ‘Personn parmi lepep ki ena 20 an ouswa plis pa pou rant dan pei Canaan. Zot finn trouv bann mirak ki mo’nn fer dan l’Égypte ek dan dezer, me la osi zot pa fer mwa konfians. Alor zot pou vire-tourne dan dezer pandan 40 an ziska ki dernie dimounn ki reste mor. Zis Josué ek Caleb ki pou rant dan pei Canaan.’

Nombres 13:1-33; 14:1-38.