Sturka 38

Biki Kakaira 12 Nani Ba

WAITNA dus ma twilki nani ba kais. Waham bunska kum twilki ba nahki tara ba sin kais, waitna wal dus kum ra mangki twilkaia nit sa. Kwah bara drap ma nani sin tilara brih auya ba kaikisma. Dusa ma nani ba ani wina sakan ki? Kenan tasbaia wina. Kenan ba Ebraham, Aisak bara Jekob tasbaia kan ba kupiam krauks. Sakuna baha pliska ra plun wauhwanka takan ba mita, Jekob ai pamalika aikuki Idsipt kuntrika ra wan. Bara 216 mani luan ningkara Moses mita kli Israel uplika nani ra Kenan tasbaia ra brih wan. Nanara Kadis, upla iwras tasbaia ba ra bangwi kan.

Kenan tasbaia ra upla saura baman iwi kan. Baha mita, Moses biki kakaira 12 ra bliki naku win: ‘Man nani pliki kais baha ra upla an iwi sa sapa bara uplika nani ba karna bangwisa sapa sin. Pliki kaiki bangws tasbaia ba plun mangkaia pain sa sapa. Bara bali bangwma taim dus ma nani sin kum kum bribal.’

Biki kakaira nani ba kli Kedis ra bali bangwan pyua ra, Moses ra naku win: ‘Tasbaia ba rait pali pain sa.’ Baku ba marikaia dukyara, witin nani naha dusa ma nani ba bribalan. Sakuna biki kakaira 10 ba mita naku win: ‘Bara iwi uplika nani ba tara bara karna sa. Taunka dakbaia trai kaikbia sa kaka, wan iki bangwbia.’

Israel uplika nani ba naha wali uba sirang iwan. Witin nani aisan: ‘Upla iwras tasbaia na ra apia kaka Idsipt ra pruan kata kau pain kaia kan. Nanara yawan nani war aiklabi prubia, bara wan maîa mairin wan luhpia nani aikuki alki alba baku brih wabia. Kaisa yawan upla kum saki briaia, wan ta bri kli Idsipt ra wan brih wabia!’

Sakuna biki kakaira wal ba Jehova ra kasak luki kan bara taun uplika nani ra maisanihkaia trai kaiki kan. Witin nani nina ba Jasua bara Kalib maki kan, bara witin nani naku win: ‘Sibri bangwpara. Jehova ba yawan wal sa. Tasbaia ba dakbi briaia isi kabia.’ Sakuna upla nani ba witin nani ra walaia watlika ra, iki bangwaia trai kaikan.

Baku daukan ba mita Jehova uba ai kupia sauhki, Moses ra win: ‘Upla nani 20 mani wina ai purara bri ba kumi sin Kenan tasbaia ra dimbia apia. Kan sain nani Idsipt ra bara naha upla iwras tasbaia ra daukri nani ba kaikisi, witin nani kau yang ra kasak luki bangwras sa. Baha mita witin nani upla iwras tasbaia ra 40 mani ban wapi tauki kabia las ba prubia kat. Dis Jasua bara Kaleb wal baman Kenan tasbaia ra dimbia.’

Kulki kaikan 13:1-33; 14:1-38.