TALA vusuka vu va na ambata ava vamala vali aha. Tala eli licindzomia lia viniu ku hama. Ku vanga vamala vavali va na hasa ku li ambata ha mukambo. Tala naua vinkuyu na vilomasi. Kuli vua fumu vusuka vua ku vuaha ngeci? Ku cifuti ca Kanana. Vuluka nguove Kanana cikeco cifuti ca kele Avilahama, Isake na Yakomba. Vunoni omo lia  ndzala, Yakomba na vusoko vueni va alukilile ku Ingito. Vuovuno mu nima ya miaka 216, Mosesa a li na ku tuamenena naua vaIsaleli mu ku va hiluisa ku Kanana. Va li mu zindinda ku cihela ci va luka nguavo Kandese.

Mu cifuti ca Kanana mua kala vantu va ku pihia. Ngeci Mosesa na tumu vandondzi 12 na ku va sika ngueni: ‘Hamenu mu ka tantekeye vantu vangahi va kalamo, na ndzili ingahi va kala nayo. Mu ka tala naua livu, nga lia vuilo. Kaha ku mu ka nehako vumo vusuka linga tua ku vu mone’.

Omo vandondzi va na hiluka ku Kandese, va na leka Mosesa nguavo: ‘Capua mpundu cifuti ca cili’. Kaha mu ku muesa vusunga, va na lekesa Mosesa vusuka. Vunoni vandondzi 10 nguavo: ‘Vantu va tungako va ku tuntuka kaha va ngolo. Nga tu ka seteka ku va tambula cifuti tu ka tsa.’

Kaha omo vaIsaleli va vuile ngoco va zazele. Kaha nguavo: ‘Ci li ku lutue nga tua tsililile ku Ingito, ambe muno mu zindinda, muomu va ka tu tsiha mu ndzita, kaha vampuevo vetu na vana vetu va ka va pukula. Tu hangulenu ntuamena ueka mu ku sintsisa Mosesa kaha tu hilukenu ku Ingito.’

Vunoni vandondzi vavali va tsilielele Yehova, kaha va setekele ku simpisa vantu. Mazina avo Yehosua na Kaleve. Va handekele Nguavo: ‘Kati mu ivue vuoma. Yehova a li netu. Ci ka pua ca casi ku va tambula cifuti’. Vunoni vantu ka va va halakanene. Va tonda na ku tsiha Yehosua na Kaleve.

Eci ci na nienguesa cikuma Yehova, ngeci na leka Mosesa ngueni: ‘Fume ha muntu a li na miaka 20 ku tuala ku lutue, ka va ka kovela mu cifuti ca Kanana. Va na muene vikomoueso vi nja lingile mu Ingito kaha na vize vi nja lingi mu zindinda, vunoni kasi ka va nji tsilielele. Ngeci mukemuo, va ka heliangela mu zindinda miaka 40, noho vose va na tsi. Vunoni va Yehosua na Kaleve lika va ka kovela mu cifuti ca Kanana.’