Tanojnots 38

Majtaktiomome tapijpianij

XIKITA kuoujtakilomej tein kimamajtokej nejin takamej. Xikyekita, se ueyi majtsakal uvas. Ome takamej moneki kikechpanoskej ika se kuouit. Uan xikita okseki kuoujtakilomej. ¿Kani kikuitoj nejin kualtsitsin kuoujtakilomej? Itech tal tein poui Canaán. Xikelnamiki ika ompa nemiaj Abraham, Isaac uan Jacob. Sayoj ika keman kinajsik se mayan, Jacob mokaltalito Egipto iuan ichankauan. Keman panok kemej 216 xiujmej, Moisés oksepa kiniuikatoya israelitas Canaán. Uan keman nejnentoyaj motsakuilijkej Qadés taluakyan.

Canaán nemiaj taltikpakneminij tein amo yolkualmej. Yejika Moisés kintitanik 12 tapijpianij uan kiniluij: ‘Xikitatij ox moajsij tel miakej taltikpakneminij uan ox tel chikaujkej. Xitachiatij ox moteltachiua. Uan xikualkuikan seki kuoujtakilomej’.

Keman tapijpianij mokepkej Qadés, kiiluijkej Moisés: ‘Yekmelauj se kuali tal’. Uan kinextilijkej seki kuoujtakilomej uan ika nejon maj kinineltokiliani. Sayoj ika majtakti tapijpianij kijtojkej: ‘Taltikpakneminij tein ompa moajsij tel uejueykej uan tel chikaujkej. Komo tikintalkuiliaj, techmiktiskej’.

Israelitas motelmoujtijkej keman kikakkej nejon. Kijtojkej: ‘Okachi kuali maj timikinij Egipto oso nikan taluakyan. Timikiskej itech neteuil, uan tonamikuan uan tokoneuan mokauaskej imimaixko tein techtauelitaj. ¡Maj tikauakan Moisés uan maj tikijitakan se yankuik tayekankej, uan maj timokepakan Egipto!’

Sayoj ika, ome tapijpianij tein motokaytijkej Josué uan Caleb takuaujtamatkej iuan Jiova, uan kitemojkej keniuj kiniyolchikauaskej israelitas. Kiniluijkej: ‘Amo ximomoujtikan. Jiova touan yetok, uan amo ouij timoaxkatiliskej tal’. Sayoj ika, israelitas amo kikakkej. Uan amo sayoj nejon, ta kinekiaj kinimiktiskej Josué uan Caleb.

Jiova kitelkualantij tein kichiujkej, yejika kiiluij Moisés: ‘Amo kalakis niose taltikpaknenkej tein kipias 20 xiujmej oso okachi itech tal tein poui Canaán. Kiitakej mouiskatekimej tein nikchiuak Egipto uan taluakyan, uan ayamo takuaujtamatij notech. Yejika nentinemiskej taluakyan 40 xiujmej, uan nochin ompa tami mikiskej. Sayoj Josué uan Caleb kalakiskej itech tal tein poui Canaán’.

Números 13:1-33; 14:1-38.