Doce ichtakatlachixkej
Historia 38
Doce ichtakatlachixkej
XKITA tlakilyomej tlen yejon tlakamej kuajkechpanouaj. Xkita kenon san se imakojyo melak miyek uvas kipiya. Omemej tlakamej noneki makikechpanokan. Xkita granadas niman higos. ¿Kanon okinkuitoj yejuin kuajkuajli tlakilyomej? Ipan país itoka Canaán. Xkilnamiki ika, ipan yejon país itoka Canaán chantiyaj Abrahán, Isaac niman Jacob. San ika, ijkuak xok onkatka tlakuajli, Jacob iuan ichanejkauan oyajkej Egipto. Aman, ijkuak yopanok kanaj 216 xiujtin, Moisés oksejpa kinuika israelitas ipan Canaán. Aman nemij ipan tlaluaktli Qadés.
Akin chantij Canaán, melak xkuakualtin. Ika yejon, Moisés kintitlani 12 tlakamej maichtakatlachiatij niman kimijlia: ‘Xkitatij kechmej chantij ompa, niman tla melak kojtikej. Xkitakan tla yejon tlaltin tlatlakitiaj. Niman xkuajkuikan seki tlakilyomej’.
Ijkuak onokuepkej akin oichtakatlachiatoj Qadés, kijliaj Moisés: ‘Melak kualtsin yejon país’. Niman okitkikej seki tlakilyomej niman ijkon makinneltokakan. San ika, majtlaktli akin oichtakatlachiatoj kijtouaj: ‘Tlaltikpakchanejkej akin ompa chantij melak uejkapamej niman kojtikej. Tla tikyejyekoskej tikinkuiliskej yejon país, techmiktiskej’.
Ijkuak yejuin okijtokej, israelitas melak onomojtijkej. ‘Kuajli yeskia tla timikiskiaj Egipto noso nikan ipan tlaluaktli’, kijtouaj. ‘Techmiktiskej ijkuak tikimixnamikiskej, niman tosiuauan iuan tokoneuan kinmasiskej. ¡Maka sa Moisés matechyekana, matiktlapejpenikan okse, niman matokuepakan Egipto!’
San ika, omemej akin oichtakatlachiatoj kineltokaj ika Jehová kinpaleuis, niman kimijliaj ika maka manomojtikan. Intoka Josué niman Caleb. Kijtouaj: ‘Maka xmomojtikan. Jehová touan nemi. Uelis totlatki yes yejon país’. Israelitas xkinkakij niman kinekij kinmiktiskej Josué niman Caleb.
Yejuin melak okikualani Jehová, niman kijlia Moisés: ‘Nochimej akin kipiyaj 20 xiuitl ika tlayekapan, xkalakiskej Canaán. Maski yokitakej milagros tlen onikchiuj Egipto, noijki ipan tlaluaktli, ok xnechneltokaj. Ika yejon, kistinemiskej ipan tlaluaktli 40 xiuitl hasta kampa nochimej mamikikan. San Josué niman Caleb kalakiskej Canaán’.
