NEA baka ma ne mɔɔ mrenya ɛhye mɔ zo la. Nea kɛzi vanye ne taakɛ le mgbole la. Ye ɛnlomboɛ ti, menli nwiɔ a gyɛnva na bɛahola ye soa a. Nea feege ma ne. Baka ma ngɛnlɛma ɛhye vi ni? Ɔvi Keena azɛlɛ zo. Kakye kɛ Ebileham, Ayezeke nee Gyekɔbo dɛnlanle Keena wɔ mekɛ bie anu. Noko ɔlua ɛhɔne ne mɔɔ zile ɛkɛ ne la ati Gyekɔbo ne ye abusua ne dule hɔdɛnlanle Yigyibiti. Akee ye ɛvolɛ 216 anzi, Mosisi ɛlɛfa Yizilayɛma azia ahɔ Keena. Bɛradwu fienemgbole ne anu ɛleka mɔɔ bɛfɛlɛ ye Keedɛhye la.

Ɛtanevolɛma wɔ Keena azɛlɛ ne azo. Yemɔti Mosisi zoanle menli 12 na ɔhanle ɔhilele bɛ kɛ: ‘Bɛhɔnlea menli dodo mɔɔ wɔ maanle ne anu la na bɛnlea kɛzi bɛ anwosesebɛ de la. Bɛnlea saa azɛlɛ ne kye aleɛ a. Na bɛva nehane mbaka ma ne bie bɛrɛla.’

Mekɛ mɔɔ busiama ne mɔ ziale rale Keedɛhye la, bɛzele Mosisi kɛ: ‘Azɛlɛ ne kye aleɛ bɔkɔɔ.’ Bɛvale ɛkɛ ne baka ma ne bie bɛhilele Mosisi. Noko busiama ne anu 10 hanle kɛ: ‘Menli mɔɔ de azɛlɛ ne azo la le mgbole na bɛ nwo yɛ se kpalɛ. Saa yɛbɔ mɔdenle kɛ yɛfa bɛ azɛlɛ ne a bɛbahu yɛ muala.’

Yizilayɛma ne zulole kpole wɔ mekɛ mɔɔ bɛdele edwɛkɛ ɛhye la. Bɛhanle kɛ: ‘Ɔle kpalɛ kɛ anrɛɛ yɛwule Yigyibiti azɛlɛ zo anzɛɛ wɔ fienemgbole ɛhye anu. Yɛbawuwu dadeɛ nloa na bahye yɛ mraalɛ nee yɛ mra nuokɛ. Bɛmaa yɛye kpanyinli fofolɛ yɛmaa ɔli yɛ ti na yɛzia yɛhɔ Yigyibiti!’

Noko busiama ne anu nwiɔ lɛ anwodozo wɔ Gyihova anu na bɛbɔle mɔdenle kɛ bɛbodo menli ne. Bɛmɛ a le Dwɔhyua nee Kalɛbe. Bɛzele bɛ kɛ: ‘Bɛmmasulo. Gyihova ne yɛ lua. Ɔnrɛyɛ se kɛ yɛkɛva azɛlɛ ne.’ Noko menli ne andie. Anrɛɛ bɛku Dwɔhyua nee Kalɛbe bɔbɔ.

Ɛhye manle Gyihova vale ɛya kpole, na ɔhanle ɔhilele Mosisi kɛ: ‘Menli mɔɔ ɛli ɛvolɛ 20 mɔɔ kɔ la biala agyakɛ ba ɛnrɛtia Keena azɛlɛ ne azo. Bɛnwu me nwanwane ninyɛne mɔɔ menyɛle ye wɔ Yigyibiti nee fienemgbole ne anu la noko akee bɛanlie me bɛanli. Yemɔti bɛbaluolua fienemgbole ye anu ɛvolɛ 40 kɔkpula kɛ mɔɔ li amozi kolaa la bawu. Dwɔhyua nee Kalɛbe ala a bahɔ Keena azɛlɛ ne azo a.’