CHAWILAMPEʼ ri uwäch cheʼ keqam ri achijabʼ. Xawilo che sibʼalaj nim wajun uqʼabʼ uva. Rajawaxik che e kebʼ achijabʼ keqam bʼi chirij jun cheʼ. Xuqujeʼ chawilaʼ ri higos xuqujeʼ karnata. ¿Jachiʼ xepe wi wa utzalaj täq uwäch cheʼ riʼ? E petinäq pa tinamit Canaán. Masach chawe che Canaán are ri tinamit jachiʼ, o ni, xekʼejeʼ wi ri Abrahán, Isaac xuqujeʼ Jacob. Rumal chiʼ xpe jun nimalaj wiʼjal, Jacob xeʼukʼam bʼi ri ufamilia pa Egipto. Chiʼ qʼaxnäq chi 216 junabʼ, ri Moisés xeʼukʼam chi bʼi ri israelitas pa ri Canaán. Kimik e kʼo pa jun chaqiʼj ulew ubʼiʼ Qadés.

Pa Canaán e kʼo itzel täq winaq. Rumal laʼ Moisés xeʼutaq bʼi 12 achijabʼ che rilik ri tinamit, are waʼ xubʼij chike: ‹Jix chiwilaʼ jampaʼ winaq e kʼo chilaʼ, xuqujeʼ we nim kichoqʼabʼ kʼolik. Chiwilaʼ la utz ri ulew che tikoʼn. Chikʼama lo nikʼaj uwäch cheʼ chaqe›.

Chiʼ ri achijabʼ xetzelej Qadés, are waʼ xkebʼij che ri Moisés: ‹Are qas jun utzalaj tinamit›. Rech kukoj wariʼ, xkekʼut nikʼaj uwäch cheʼ chuwäch. Tekʼuriʼ 10 chike ri achijabʼ are waʼ xkebʼij: ‹Ri winaq e kʼo chilaʼ sibʼalaj e nim xuqujeʼ nim kichoqʼabʼ. We kqesaj ri tinamit chike, kojkekamsaj›.

Sibʼalaj xkexibʼij kibʼ ri israelitas chiʼ xketa wariʼ. ‹Are utz we xojkam kan Egipto o waral pa ri chaqiʼj ulew›, xechaʼ. ‹Kojkam kʼu na pa chʼoj, tekʼuriʼ ri täq qixoqil rukʼ ri täq qalkʼwal kekʼam bʼik. ¡Chqachaʼa chi jun chik ajkʼamal bʼe chaqe, are ta chi ri Moisés, tekʼuriʼ chojtzalij pa Egipto!› Xechaʼ.

Tekʼuriʼ kebʼ chike ri 12 achijabʼ xkekubʼsaj kikʼuʼx chirij Jehová, tekʼuriʼ xkaj xkekubʼsaj kikʼuʼx ri tinamit. Ri jun ubʼiʼ Josué ri jun chik ubʼiʼ Caleb. Are waʼ xkebʼij: ‹Xaq mixibʼij iwibʼ. Ri Jehová kʼo qukʼ. Kqariq ta kʼäx che uresaxik ri ulew chike›. Tekʼuriʼ ri tinamit xkaj täj xketo. Are xkaj xkekamsaj ri Josué rukʼ ri Caleb.

Sibʼalaj xpe royowal ri Jehová, rumal laʼ are waʼ xubʼij che Moisés: ‹Nijun chike ri winaq kʼo 20 ujunabʼ o qʼaxnäq chik che wariʼ kkunik kok pa ri tinamit Canaán. Xkil kʼi täq etal che xinbʼan pa Egipto xuqujeʼ pa ri chaqiʼj ulew tekʼuriʼ xkekubʼsaj ta kikʼuʼx chwij. Rumal laʼ kebʼin na 40 junabʼ pa ri chaqiʼj ulew tekʼuriʼ kekam konojel. Xaq xiw Josué rukʼ Caleb kekunik keʼok pa ri tinamit Canaán›.