BÂ LÊ ti keke so akoli so ayô na ndogo ti ala. Bâ tongana nyen vigne so akono mingi, na a hunda akoli use ti yô ni. Bâ nga afigue ni na agrenade ni. Apendere lê ti keke so alondo na ndo wa? A londo na sese ti Canaan. Canaan ayeke ndo so lani Abraham, Isaac na Jacob aduti dä. Me ndali ti so kota nzara amû yâ ti sese ti Canaan, Jacob na afami ti lo kue ague na Égypte. Ngu 216 na pekoni, Moïse ayeke kiri fadeso na azo ti Israël na sese ti Canaan. Ala si na mbeni ndo na yando so a iri ni Kadès.

Azo ti sese ti Canaan ayeke sioni. Tongaso, Moïse atokua awakala 12, na lo tene na ala: ‘Ala gue abâ azo oke si ayeke kâ, na ala bâ wala ala yeke ngangu mingi. Ala bâ nga wala sese ni ayeke nzoni ndali ti akobe. Ala girisa nga pëpe ti ga na ambeni lê ti keke ni.’

Tongana awakala ni akiri na Kadès, ala tene na Moïse: ‘Sese ni ayeke tâ pendere mingi!’ Ti fa so a yeke tongaso, ala fa na lo ambeni lê ti keke ni. Me, na popo ti awakala 12, ala 10 atene: ‘Azo ti kodoro ni akono mingi nga ala yeke ngangu mingi. Ala yeke fâ e tongana e gue ti mû kodoro ti ala.’

Tongana azo ti Israël amä tënë so, mbeto asara ala. Ala tene: ‘A yeke nzoni fade ti kui na Égypte wala na yando ge. Ala yeke fâ e tongana e tiri na ala, na ala yeke gbu awali ti e na amolenge ti e. Zia e soro mbeni fini mokonzi na place ti Moïse, na e kiri na Égypte!’

Me awakala use azia bê ti ala kue na Jéhovah, na ala tara ti kaï azo ni. Iri ti ala ayeke Josué na Caleb. Ala tene: ‘Ala sara mbeto pëpe. Jéhovah ayeke na e. A yeke ngangu pëpe ti mû sese ni.’ Me azo ni ake ti mä tënë ti ala. Ala ye même ti fâ Josué na Caleb.

Ye so azia ngonzo na bê ti Jéhovah mingi, si lo tene na Moïse: ‘Zo kue so ayeke na ngu 20 ti gue na ni ayeke lï na sese ti Canaan pëpe. Ala bâ lani amiracle so mbi sara na Égypte nga na yando, me ade ala mû bê ti ala kue na mbi pëpe. Tongaso, ala yeke tambela na yando teti ngu 40 juska azo so kue akui. Gi Josué na Caleb si ayeke lï na sese ti Canaan.’