TENNE mannootu duqqitino laalo lai. Tini woyinete hunduruurro mageeshshi duˈmuulleetiro lai. Daawaayyichchu aana wore duhate lamu manni hasiisanno. Qolteno ledo noore belesetenna roomaanete gumma lai. Tini hunduruurritino laalo hiikkiinni abbinoonnite? Kanaˈˈaani gobbanni abbinoonnite. Kanaˈˈaani gobba Abirahaami, Yisaaqinna Yaaqoobi heedhinota ikkitinota qaagi. Ikkollana hatte gobbara mannu hudirita, Yaaqoobi maatesi ledo Gibitse haˈrino. Xa kayinni 216 diri gedensaanni, Muse Isiraeele fushshe Kanaˈˈaani qole abbanni no. Isiraeeleno halallaho hadhanni Qaadeesi yinanniwa iillitu.

Kanaˈˈaani gobbara bushu manni heeˈranno. Konni daafira Muse 12 qotaano fushshe togo yee soyi: ‘Hakko heeˈranno manni mageeshshihoronna mageeshsha wolqaataammahoro qotte. Baatto loosiˈrate injiitannoteronna teˈee lae. Hakko heeˈranno laalchi giddonni gama haadhine amme.’

Qotaano qotte kaˈuti Qaadeesi higge Musera, ‘Gobba lowo geeshsha danchate’ yitu. Baatto dancha ikkitinota leellishate abbitino laalo Musera leellishshu. Qotaanote giddonni 10 kayinni togo yitu: ‘Hakko heedhanno mannooti lowiddaannahonna wolqaataammaho. Gobba adhate marrummoro shitannonke.’

Isiraeeleno tenne macciishshituti, lowo geeshsha waajjitu. Insano, ‘Gibitsete gobbara woyi koye halallaho reya woyyitannonkenka. Olu bayichcho reyinammoraati; galtenkenna qaaqquullinkeno horramaraati. Amme Muse bayichcho wole massagannonkeha doodhine Gibitse hingona!’ yitu.

Qotaanote giddonni lamu kayinni Yihowanni addaxxite manna hayi yitu. Insa suˈmi Iyyaasuutinna Kaaleebiiti. Insa togo yitu: ‘Waajjitinoonte. Yihowa ninke ledo noona. Baatto adha hakkeeshsha diqarrissanno.’ Mannu kayinni insa yitinore macciishsha giwi. Iyyaasunna Kaaleebi shaara nafa kai.

Tenne ikkitonsanni Yihowa lowo geeshsha hanqe Musera togo yee kulisi: ‘Dirisi 20 ikkinohunna hakkiinni sainohu mittuno Kanaˈˈaani gobba dieanno. Gibitsetenna halallaho assoommo maalale laˈino; ikkeennano xaa geeshsha anenni diaddaxxitino. Konni daafira halallaho baalunku reyite gooffa geeshsha 40 diro raataabbanno. Iyyaasunna Kaaleebi calla Kanaˈˈaani gobba eˈanno.’