ASE ubuke letitselo letiphetfwe ngulamadvodza. Uyasibona lesitfungo semagilebisi kutsi sikhulu kanganani. Singaphakanyiswa ngemadvodza lamabili asebentisa lugodvo. Asewuphindze ubuke lamakhiwa nemahananandza. Tibuyaphi letitselo letinhle kangaka? Tibuya eKhenani. Khumbula phela kutsi eKhenani ngulapho Abrahama, Isaka naJakobe bebahlala khona. Kodvwa ngenca yendlala leyabakhona, Jakobe nemndeni wakhe batfutsela eGibhithe. Ngemuva kweminyaka lengu-216, Mosi waholela ema-Israyeli eveni laseKhenani. Besuka endzaweni lebitwa ngekutsi iKhadeshi lesehlane.

Eveni laseKhenani bekuhlala bantfu labangakalungi. Ngako-ke Mosi watfuma tinhloli letingu-12, watitjela loku: ‘Hlolisisani kutsi bangakhi bantfu labahlala khona, nekutsi banemandla langakanani. Futsi nibuke umhlabatsi walo kutsi uvundzile yini. Nibotama ngawo onkhe emadla enu kutsi niphatse titselo talo lelive.’

Ngalesikhatsi letinhloli setibuyile tefika tatsi kuMosi: ‘Lelive lihle kakhulu.’ Taphindze tamkhombisa netitselo talo. Kodvwa tinhloli letingu-10 tatsi: ‘Labantfu lesibabonile bakhulu futsi banemandla. Batasibulala nasingazama kutsatsa lelive labo.’

Ema-Israyeli afikelwa kwesaba nakeva loku, atsi: ‘Kube samane safela eGibhithe nome ehlane, kunekutsi sibulawe emphini bese kutfunjwa bafati betfu nebantfwabetfu. Asikhetse umholi lomusha lotawuba sesikhundleni saMosi, sincandzeke sibuyele eGibhithe.’

Kodvwa letinhloli letimbili tetsembela kuJehova, futsi tetama kubehlisa umoya. Emagama ato kwakunguJoshuwa naKhalebi. Tatsi: ‘Ningesabi, Jehova unatsi. Kutawuba melula kutsatsa lelive.’ Kodvwa labantfu abazange batilalele, bebafuna ngisho nekutibulala.

Jehova watfukutsela ngalesentakalo, futsi watsi kuMosi: ‘Kute namunye kulabo labaneminyaka lengu-20 kuya etulu loyawungena eveni laseKhenani. Batibonile timangaliso lengitente eGibhithe naleto lengatenta ehlane, kodvwa solo abangetsembi. Ngako batawuhlupheka lapha ehlane iminyaka lengu-40, kuze kufe wekugcina wabo. NguJoshuwa naKhalebi kuphela labatawungena eveni laseKhenani.’