ATAYÁÁ xndú taun rí kuda xa̱bu̱ bugi̱. Atayáá dí ra̱ʼkhá tháán mbaʼa uva tima náa mbóó ixu̱u̱. A̱jmi̱i̱n xa̱bu̱ gíʼmaa rí muda ga̱jma̱a̱ mbóo ixi̱. Ma̱ngoo atayáá higo ga̱jma̱a̱ granada. Náa ni̱ʼkha̱ xndú taun rí mitsaan wéñuʼ rígi̱ rá. Náa ku̱ba̱ʼ ndrígóo Canaán. Garmáʼáan a̱jkia̱nʼ, rí xuajin Canaán ni̱ndxu̱u̱ náa nixtáa Abrahán, Isaac ga̱jma̱a̱ Jacob. Mú ga̱jma̱a̱ numuu ewiʼ dí nirígá ikhí, Jacob ni̱jkha̱ gáxtáa gajmíi̱n bi̱ kuwa náa goʼwóo náa xuajin Egipto. Índo̱ ninújngoo 216 tsiguʼ, Moisés na̱jkha̱ kagu̱u̱n mbu̱júu̱ israelitas náa Canaán. Rí xúgi̱ kuwa náa Cades, náa ku̱ba̱ʼ gíná.

Náa ku̱ba̱ʼ ndrígóo Canaán kuwa xa̱bu̱ bi̱ ra̱míjínʼ. Ikha jngó Moisés nakunguinʼ mbá 12 xa̱bu̱ bi̱ muñama ga̱jma̱a̱ naʼthúún: ‹Aʼgua̱ gúya̱a̱ nguáti̱i̱n xa̱bu̱ kuwa ikhí, ga̱jma̱a̱ á mu rí migújkuínʼ. Gu̱ya̱a̱ á mu rí májánʼ ku̱ba̱ʼ miʼdu. Ga̱jma̱a̱ aguwaʼ kudalaʼ tikhuu xndú taun›.

Índo̱ rí xa̱bu̱ bi̱ nuñama natangi̱i̱n náa Cades, nutháán Moisés: ‹Gajkhun rí májánʼ ni̱ndxu̱u̱ ku̱ba̱ʼ›. Mu mbaʼyoo rí xúʼko̱ kaʼnii ni̱ndxu̱u̱, nusngajmaa tikhuu xndú taun. Mú mbá 10 xa̱bu̱ bi̱ nuñama nuthi: ‹Xa̱bu̱ bi̱ kuwa ikhí ni̱ndxu̱ún mbijui̱i̱n ga̱jma̱a̱ migújkuínʼ. Á mu nuʼgíiʼ murigu kaʼñúnʼ ku̱ba̱ʼ, muradiáanʼ›.

Namiñun índo̱ nudxawíín rígi̱ israelitas. Ikha jngó nuthi: ‹Itháan májánʼ niʼni á mu nikháñuluʼ náa Egipto o gi̱i̱ náa ku̱ba̱ʼ gíná. Makhañuluʼ náa muxmíjna, ga̱jma̱a̱ guʼyuluʼ, ejñuluʼ murugui̱i̱n. ¡Mbuʼyááʼ mbáa bi̱ mayeʼga edxu̱u̱ náa ikháanʼ bi̱ mariʼkuriyaʼ Moisés, ga̱jma̱a̱ matangáanʼ náa Egipto!›.

Mú a̱jmi̱i̱n xa̱bu̱ bi̱ nuñama nakumu̱ún kuyáá Jeobá, ma̱ngoo nuni̱ rí xámiñun xa̱bu̱ xuajin. Ikhiin nagumbiʼñún Josué ga̱jma̱a̱ Caleb. Nuthi: ‹Xámiñalaʼ. Jeobá xtáa ga̱jma̱á nindxu̱lúʼ. Xáʼni miʼskhaa mbuʼyá ku̱ba̱ʼ rúʼko̱›. Mú xuajin tsédxuun. Ga̱jma̱a̱ asndu nandún muxiyáa Josué ga̱jma̱a̱ Caleb.

Jeobá nakiʼnáa wéñuʼ ga̱jma̱a̱ numuu rígi̱, ikhú naʼthúu̱n Moisés: ‹Nimbáa xa̱bu̱ bi̱ gíʼdoo 20 tsiguʼ ga̱jma̱a̱ bi̱ gíʼdoo itháan tsiguʼ xándoo makrújngoo náa ku̱ba̱ʼ ndrígóo Canaán. Ndiyáá milagro rí ikhúúnʼ ni̱ni̱ náa Egipto ga̱jma̱a̱ náa ku̱ba̱ʼ gíná mú asndu xóó tsékumu̱ún kuyoʼ. Ikha jngó majnguʼun náa ku̱ba̱ʼ gíná mbá 40 tsiguʼ asndu gákhañu gimba̱ wíjtsíí xa̱bu̱. I̱ndó Josué ga̱jma̱a̱ Caleb matu̱ʼu̱u̱n náa ku̱ba̱ʼ ndrígóo Canaán›.