ILAWIL ja sat tekʼulik skʼechuneje ja winike it. Kʼela jaye sniwanil ja xchiwanal ja tsʼusubʼi. Chawane winike skʼechuneje bʼa jun teʼ. Sok ila ja tuk tekʼulik jumasaʼ. ¿Bʼa naka jakel ja lekil tekʼulik it? Ti bʼa slujmal Canaán. Ajuluk akʼujol, ti tiw ajyiye sakʼan ja Abrahán, Isaac soka Jacob. Pe yujil ja waʼin koʼ ja tiwi, ja Jacob sok ja spamilya wajye man bʼa Egipto. Jun xa 216 jabʼil ekʼel, ja yan ja Moisés wanxa yajel kumxuk ja israʼelenyo man bʼa Canaán. Ja yuj tixa aye bʼa Qadés, bʼa takin luʼum.

Ja swinkil ja Canaán mini tʼun lekuk ja jas wa skʼulaneʼi. Ja yuj ja Moisés sjeka 12 winik bʼa oj waj skʼel-e nakʼul ja luʼumi sok yala yabʼye: «Kax ilawik janekʼ ixuk winik ay, sok ila ta chapan aye. Kʼelawik ta lek yaʼteltajel ja luʼumi sok iʼawik jan jujuntik sat tekʼul».

Yajni ja kʼeluman jumasaʼ kumxiye bʼa Qadés, yalawe yabʼ ja Moisés: «Ja smeranili juni lekil chonabʼa». Bʼa oj skʼuʼuke, sjeʼawe yi jujuntik sat tekʼulik. Pe lajune bʼa yeʼnle yalawe yabʼ ja Moisés: «Ja swinkil ja chonabʼi jel niwakik sok jel chapane. Ta jleʼatik modo bʼa oj jbʼajuktik ja chonabʼi, ojni smil-otikeʼa».

Yajni ja israʼelenyo yabʼye ja it jel xiwye, sok yalawe: «Mas lek tiʼukto chamkotikon bʼa Egipto ma ja il bʼa takin luʼumi. Ojni chamkotikon bʼa yojol ja kʼakʼaneli, jaxa jcheʼumtikoni ja kuntikiltikoni oj yamjukekan. ¡La jtsatik pilan olomal sok mixa jaʼuk ja Moisés sok la kumxukotik bʼa Egipto!».

Pe chawane bʼa yeʼnle sjipawe skʼujol bʼa Jyoba: Josué sok Caleb. Ja yeʼnle sleʼawe modo bʼa oj ya lamxuk ja ixuk winiki. Yalawe: «Mok xiwanik. Ja Jyoba tini ay jmoktika. Mini wokoluk oj bʼajuktikan ja luʼumi». Pe ja israʼelenyo mini smaklayeʼa sok sleʼawe modo oj smil-e ja Josué sok ja Caleb.

Ja it jel aji tajkuk ja Jyoba, ja yuj yala yabʼ ja Moisés: «Mini jun ixuk winik ja maʼ ayiʼoj 20 sjabʼil maʼ mas oj ochuk ja bʼa xchonabʼil Canaán. Yiluneje xa ja senyaʼik jkʼulan ja bʼa Egipto sok ja bʼa takin luʼumi, pe mini sjipa skʼujole jmok. Ja yujil oj ajyuke ekʼ 40 jabʼil jachʼ lom ja bʼa takin luʼumi masan xcham spetsanil ja bʼa kʼole jaw. Kechan ja Josué soka Caleb oj ochuke ja bʼa slujmalil Canaán».