LUKIM ol prut ol dispela man i karim. Dispela han bilong ol grep i bikpela tru, a? Olsem na tupela man i mas putim long diwai na karim. Na lukim ol fik na pomigranet. Ol dispela naispela prut i kam we? Long graun bilong Kenan. Tingim, Kenan em ples we bipo Abraham, Aisak, na Jekop i bin sindaun long en. Tasol bikpela hangre i bin kamap na Jekop wantaim famili bilong em i go long Isip. Nau, 216 yia bihain, Moses i bringim ol Israel i kam bek long Kenan. Ol i stap long ples drai nating long wanpela hap ol i kolim Kades.

Ol manmeri nogut i stap long Kenan. Olsem na Moses i salim 12-pela man i go bilong lukstil, na em i tokim ol: ‘Yupela lukim gut hamas manmeri i stap, na ol i strongpela lain o nogat. Na lukim olsem graun i gutpela bilong planim ol samting o nogat. Na bringim sampela prut i kam bek wantaim yupela.’

Taim ol man bilong lukstil i kam bek long Kades, ol i tokim Moses: ‘Em i gutpela graun.’ Na bilong truim tok bilong ol, ol i soim sampela prut ol i bin bringim i kam. Tasol 10-pela man bilong lukstil i tok: ‘Ol man i stap long dispela hap ol i traipela na strongpela. Ol bai kilim yumi i dai sapos yumi laik kisim dispela hap.’

Ol Israel i pret taim ol i harim dispela tok. Ol i tok: ‘I gutpela moa sapos yumi bin i dai long Isip o hia long ples drai nating. Ol bai kilim yumi i dai long pait na ol bai kisim ol meri pikinini bilong yumi. Yumi makim wanpela nupela hetman bilong senisim Moses na yumi go bek long Isip!’

Tasol tupela man bilong lukstil ol i bilip long Jehova, na ol i laik mekim isi bel bilong ol manmeri. Nem bilong ol em Josua na Kalep. Tupela i tok: ‘Yupela i no ken pret. Jehova i stap wantaim yumi. Bai i no hatwok long kisim dispela graun.’ Tasol ol manmeri i no harim tok. Ol i laik kilim i dai Josua na Kalep.

Dispela i mekim Jehova i kros nogut tru, na em i tokim Moses: ‘I no gat wanpela bilong ol dispela manmeri i winim 20 krismas bai i go insait long Kenan. Ol i bin lukim ol mirakel mi wokim long Isip na long ples drai nating, tasol ol i no bilip long mi. Olsem na ol bai raun long ples drai nating inap 40 yia, inap laspela man bilong dispela lain i dai. Josua na Kalep tasol bai go insait long Kenan.’