AWONA vipasi ivyo ŵanthu aŵa ŵayegha. Awona ukuru wa mukungwi wa mpheska. Ukukhumbikwira ŵanalume ŵaŵiri kuyegha pa mlongoti. Wona nkhuyu na zobala. Kasi vipasi viwemi ivi vikafuma nkhu? Vikafuma ku caru ca Kenani. Kumbuka kuti, Abrahamu, Yisake na Yakobe ŵakakhalapo ku Kenani pa nyengo yinyake. Kweni cifukwa ca njara, Yakobe na mbumba yake, ŵakasamukira ku Egupto. Pamanyuma pa vilimika 216, Mozesi wakalongozga Ŵaisrayeli kuweleraso ku Kenani. Ŵakafika pa malo ghanyake mu mapopa ghakucemeka Kadeshi.

Mu Kenani mukakhalanga ŵanthu ŵaheni. Ntheura Mozesi wakatuma mphaci 12, panji ŵanthu ŵakuti ŵakaskore caru, ndipo wakaziphalira kuti: ‘Lutani mukawone unandi wa ŵanthu awo ŵalimo, usange mbankhongono panji cara. Kawonani usange caru nchavundira. Mukawere na vipasi.’

Mphaci zira zati zawelera ku Kadeshi, zikaphalira Mozesi kuti: ‘Ni caru ciwemi nadi.’ Zikamulongora vipasi Mozesi kuti wagomezge ivyo ŵakuyowoya. Kweni mphaci 10 zikati: ‘Ŵanthu ŵene caru ni vinkhara ndipo mbankhongono comene. Ŵamutikoma usange tikukhumba kupoka caru cawo.’

Ŵaisrayeli ŵakatenthema comene ŵati ŵapulika ici. Iwo ŵakati: ‘Mphanyi cikaŵa ciwemi kufwira mu caru ca Egupto panji muno mu mapopa. Tamukomeka ku nkhondo, ndipo ŵawoli ŵithu na ŵana ŵithu ŵamukoleka. Tiyeni tisankhe mulongozgi muphya, Mozesi cara, kuti tiwelere ku Egupto!’

Kweni mphaci ziŵiri zikaŵika cigomezgo cawo mwa Yehova, ndipo zikayezga kuzikiska ŵanthu mitima. Mazina ghawo ni Yoswa na Kalebi. Iwo ŵakati: ‘Mungawopanga yayi. Yehova wali nase. Tamupoka caru mwambura suzgo.’ Kweni ŵanthu ŵakapulikira yayi. Ŵakakhumba kukoma Yoswa na Kalebi.

Ici cikapangiska Yehova kukwiya comene, wakaphalira Mozesi kuti: ‘Palije na yumo wakwambira vilimika 20 kuya kunthazi ŵamunjira mu caru ca Kenani. Ŵakawona minthondwe iyo nkhacita mu caru ca Egupto na mu mapopa, kweni ŵatondeka nipera kunigomezga. Mwantheura ŵayingenge mu mapopa vilimika 40 mupaka wose ŵamare petu. Yoswa yekha na Kalebi ndiwo ŵamunjira mu caru ca Kenani.’