ILAWIL te sit awal tsʼunubil te skʼechojik ta teʼ te winiketike. Sok ilawil te tsʼusub te into xchepil, jaʼ yuʼun chaʼtulto winiketik la skʼechik ta jchʼix teʼ. Sok ilawil te sit higoe sok te granadaetike. ¿Banti la yichʼik tal te sit teʼetik te tʼujbiliknaxe? La yichʼik tal ta skʼinal Canaán. Julukme ta awoʼtan, ta Canaán tey nain-a te Abraham, te Isaac sok te Jacobe. Jaʼukmeto ta swenta te wiʼnal kʼax tey-ae, te Jacob sok te jayeb machʼatik ay yuʼune bajtʼik ta nainel ta Egipto. Jaʼ yuʼun, ayniwan kʼaxemix ta 216 jaʼbil-a te kʼalal la schaʼyikʼ sujtel ta Canaán te israeletik te Moisese. Kʼotik ta Cades ta jochol takin kʼinal.

Ta Canaán nainik chopol ants winiketik. Jich yuʼun te Moisés la stikun bael lajchayeb ta jtul jtsajtaywanejetik sok jich la yaltiklambey: Ilawilik jayebto ta jtul ants winiketik te nainemik tey-ae, sok teme ay yipike. Ilawilik teme lek te kʼinale sok teme ay bin ya xchʼi tey-ae sok ichʼaik tal cheʼoxebuk sit awal tsʼunubil.

Kʼalal julik ta Cades te jtsajtaywanejetik, jich la yalbeyik te Moisese: Ta melel kʼax lek te kʼinale. Swenta yuʼun ya yakʼik ta ilel te bitʼil smelelil te bin la yalike, la yakʼbeyik yil cheʼoxebuk te sit awal tsʼunubile. Jaʼukmeto te lajuntul jtsajtaywanejetike jich la yalik: Te machʼatik ayik ta nainel tey-ae, mukʼul najtʼil winiketik sok kʼax bayal yipik. Teme ya jkʼan jpojbeytik te skʼinalike yame smilotik.

Te israeletik xiwik yuʼun te kʼalal la yaʼiyik stojol ini. Jaʼ lek te lajukotik ta Egipto o liʼnix ta jochol takin kʼinale, xchiik ta yalel. Yame xlajotik ta guerra, te kinamtik sok te kal jnichʼnabtike yame yichʼik tsakel bael. ¡Akʼa jletik yan jwolwanej kuʼuntik ma jaʼuk te Moisese sok sujtkotik bael ta Egipto!

Jaʼukmeto chaʼtul te jtsajtaywanejetik te la yakʼ smukʼul yoʼtanik ta stojol te Jehová, kʼan slamantesbeyik yoʼtan te lum swenta yuʼun ma xiwik. Te sbiil te winiketik ini jaʼ Josué sok Caleb. Jich la yalik: Mame xiwex, sjokinejotikme te Jehovae. Yame kuʼuntaytik te kʼinale. Jaʼukmeto te lume ma la skʼan schʼam yaʼiyik. Jich kʼan smilik te Josué sok te Caleb.

Ta swenta ini kʼax bayal ilin yuʼun te Jehovae, jich la yalbey te Moisese: Spisil te machʼatik jtab yaʼbilalik soknix te machʼatik kʼaxemix ta jtab yaʼbilalike, mame x-ochik ta skʼinal te Canaane. Yilojikix te milagroetik te la jpas ta Egiptoe soknix ta jochol takin kʼinal, jaʼukmeto mato ayuk smukʼul yoʼtanik ta jtojol. Jaʼ yuʼun yame xbeenik ta bayuknax ta 40 jaʼbil ta jochol takin kʼinal jaʼto teme laj spisil te machʼatik ma la smukʼulinon yoʼtanike. Jaʼnax te Josué sok te Caleb yame x-ochik bael ta skʼinal te Canaane.