KŨLĨHISA unene wo cisiakata eci cayuva. Ocisiakata caco cambatiwa lalume vavali. Kũlĩhisavo akuyu ava loromeira. Apako aco a posoka ndeti a tunda pi? Apako aco a tunda kofeka yo Kanana. Ivaluka okuti, Avirahama la Isake kuenda Yakoba, va kala ko Kanana. Pole omo lionjala ya kala ko Kanana, Yakoba lepata liaye, va ilukila Kegito. Kaliye eci papita ci soka 216 kanyamo, Mose wa kala loku songuila va Isareli oku enda ko Kanana. Ovo va pitila komunda yimue yi tukuiwa hati, Kadesi.

Vofeka yo Kanana mua kala omanu vãvi. Omo liaco, Mose wa tuma vofeka yaco olondavululi ekũi la vavali. Eye wa va sapuila hati: ‘Kũlĩhisi etendelo liomanu va kasimo. Kũlĩhisivo nda va pama ale ka va pamele. Kũlĩhisi osi yaco nda yima ovina viwa. Enjui lapako amue ofeka yaco.’

Eci olondavululi via tiukila ko Kadesi, va sapuila Mose hati: ‘Ofeka yaco ya posoka.’ Noke va lekisa ku Mose apako amue. Pole alume vamue ekũi kolondavululi va popia hati: ‘Omanu va tunga vofeka yaco vanene haivo va pama. Nda tua seteka oku tambula ofeka yaco, tu ka fa.’

Va Isareli eci va yeva ondaka yaco, va fetika oku kuata usumba walua. Va popia hati: ‘Hĩse nda tua filile Kegito! Ale hĩse nda tua filile mulo vekalasoko! Etu tu ka pondiwa kuenje akãi vetu lomãla vetu va ka kuatiwa. Tu nõli usongui umue oco tu tiukili Kegito.’

Pole olondavululi vimue vivali via kolelele ku Yehova. Omo liaco, va seteka oku tulumula ovitima viomanu. Olonduko viavo Yehosua kuenda Kalembe. Ovo va popia hati: ‘Ko ka yokoki. Yehova o kasi letu. Tu ka tambula ofeka.’ Pole omanu ka va yevele kondaka yaco. Kuenje va seteka oku ponda Yehosua la Kalembe.

Yehova weya oku tema calua kuenje wa sapuila Mose hati: ‘Wosi o kasi leci ci soka akũi avali kanyamo, ka iñila vofeka yo Kanana. Va Isareli va mola ovikomo nda linga Kegito lo vekalasoko, pole ka va kolelele kokuange. Omo liaco, va ka ñuala ñuala vekalasoko ci soka akũi akuãla kanyamo toke omunu wa sulako a fa. Yehosua la Kalembe ovo lika va iñila vofeka yo Kanana.’

Atendelo 13:1-33; 14:1-38.