ALOLE yisogosi yanyakwile acalumeŵa. Alole lisagwa lya yisogosi ya mipeleyayo. Ŵandu ŵaŵili anyakusyanile yisogosiyo. Alolesoni, ngujusyo, soni yisogosi yineyo. Ana yisogosi yakusalalayi yikutyocela kwapi? Ku cilambo ca Kanani. Akumbucile kuti ku Kanani ni kuŵatamaga mwanja Abulahamu, Isaki, soni Yakobo. Nambo ligongo lyakuti kwaliji kwana sala, Yakobo ni liŵasa lyakwe ŵasamile kwawula ku Eguputo. Sambano, pali papite yaka 216, Musa akwalongolela Ayisalayeli kuwujilasoni ku Kanani. Sambano pakwenda mwipululumo akwika pamalo gakolanjikwa kuti Kadesi.

M’cilambo ca Kanani mwatamaga ŵandu ŵakusakala. M’yoyo Musa akwatuma ŵakusonda 12, nikwasalila kuti: ‘Mkawungunye winji wa ŵandu ŵakutama m’cilambomo, soni kuti ali ŵamacili catuli. Mkawungunyesoni naga cilamboco cili cambone kulima mbeju. Soni mlolecesye kuti mkawuje ni yisogosi ya kumaloko.’

Ŵakusonda ŵala pawujile ku Kadesi, akumsalila Musa kuti: ‘Nditu cili cilambo cambone.’ Pakusaka kusimicisya, akumlosya Musa yisogosi. Nambo ŵakusonda 10, akuŵeceta kuti: ‘Ŵandu ŵakutama kweleko ali ŵakulungwakulungwa soni ŵamacili. Cacituwulaga naga tukulinga kusumula cilamboco.’

Ayisalayeli pakupikana yeleyi akogopa. Akuŵeceta kuti: ‘Yikaŵele cenene kuwila ku Eguputo kapena mwipululu muno. Catuwulaje pangondo, soni aciŵamkwetu ni ŵanace ŵetu ciŵakamule. Kwende tusagule mlongola jwine jwasambano kuti ajinjile mmalo mwa Musa, ni tuwujile ku Eguputo!’

Nambo ŵakusonda ŵaŵili akukulupilila Yehofa, ni akwatamika mtima pasi ŵandu. Mena gawo gali Yoswa ni Kalebi. Ni akwasalila ŵandu kuti: ‘Akasajogopa. Yehofa ali yimpepe ni m’weji. Ngasiyisawusya kusumula cilamboco.’ Nambo ŵandu ŵala ngakupikanila. Akwikana pakusaka kum’wulaga Yoswa ni Kalebi.

Yeleyi yamsakalisye mnope Yehofa, ni akumsalila Musa kuti: ‘Pangali mundu jwa yaka 20 kapena kupunda jucacijinjila m’cilambo ca Kanani. Jemanjaji ayiweni yakusimonjesya yanatesile ku Eguputo, soni mwipululu, nambope ngakungulupilila. Sambano cacijenda mwipululu kwa yaka 40 mpaka pacaciwa mundu jwakumalisya. Yoswa ni Kalebipe ni ŵacacijinjila m’cilambo ca Kanani.’