Historia 38

Ca doce ni yeundaachiʼ

BIIYAʼ ca cuananaxhi nuaʼ ca hombre ca. Biiyadxí pabiáʼ naroʼbaʼ beʼzaʼ uba ca. Chupa hombre napa xidé guani lu ti palu. Ne biiyaʼ ca duʼgaʼ ca ne ca granada ca. Padé beeda ca cuananaxhi sicarú riʼ pue. De guidxi Canaán. Bietenalaʼdxiʼ, Canaán nga ra guleza Abraham, Isaac ne Jacob. Peru pur guendarindaana guyuu raqué la? Jacob yendezané ca binnilidxi Egipto. Yanna, despué de chupa gayuaa dieciséis iza la? Moisés ribiguetanebe ca israelita que Canaán. Yanna nuucabe Qadés, lu desiertu.

Guidxi Canaán nabeza binni malu, ngue runi Moisés ruseenda doce hombre chigundaachiʼ ne rábibe laacaʼ: Laguuyaʼ panda binni nabeza raqué, ne pabiáʼ nadípacabe, ne laguuyaʼ pa galán layú ca para gaca dxiiñaʼ luni. Ne cadi guiaandaʼ laatu guedanetu caadxi cuananaxhi.

Ora cani yeundaachiʼ que ribiguétacabe Qadés la? rábicabe Moisés: Dxandipeʼ guizáʼ sicarú guidxi ca. Ne para gusihuínnicabe de que dxandíʼ ni la? ruluíʼcabe caadxi cuananaxhi. Peru chii de cani yeundaachiʼ que nacaʼ: Ca binni nabeza raqué nabé naróʼbacaʼ ne nadípacaʼ, ne pa gacaláʼdxinu gáxhanu laacaʼ xquídxicaʼ la? zuuticaʼ laanu.

Ca israelita ridxíbicaʼ stale ora runadiágacaʼ ca diidxaʼ riʼ. Jma galán ñátinu Egipto o lu desiertu riʼ, nácabe. Zátinu lu guendaridinde ca, ne xheelanu ne ca xiiñinu zagaacaʼ. ¡Cuinu sti xaíque para chuʼ xlugar Moisés, ne guibiguétanu Egipto!

Peru chupa de cani yeundaachiʼ que runi crecaʼ Jiobá, ne racaláʼdxicabe gucueezadxícabe ca binni guidxi que. Lácabe Josué ne Caleb. Nácabe: Cadi guidxíbitu, Jiobá nuuné laanu. Qué zácadiʼ nagana guicaanu layú ca. Peru ca binni ca qué rucaadiágacaʼ. Dede nuucaʼ guuticaʼ Josué ne Caleb.

Ni guca riʼ ruchiichi ni Jiobá, ne rábibe Moisés: Guirutiʼ de ca binni napa 20 iza o jma ziuu ndaaniʼ guidxi Canaán. Maʼ biiyacabe ca milagru bineʼ Egipto ne lu desiertu, peru caʼruʼ guni crécabe naa. Nga runi zazácabe lu desiertu cuarenta iza dede ora gati últimu de laacabe. Josué si ne Caleb ziuucaʼ ndaaniʼ guidxi Canaán.

Números 13:1-33; 14:1-38.