HYƐ mɔmɔ kɛ tso yiblii fufuihi nɛ a ngɛ tsɛ̃e ngɛ tso nɛ ɔ he. Aaron dɛma tso ɔ ji nɛ ɔ nɛ. Mɔmɔ nɛ ɔmɛ kɛ tso yiblii fufui nɛ ɔmɛ tsɛ̃ ngɛ Aaron dɛma tso ɔ he ngɛ nyɔ kake pɛ mi! Nyɛ ha waa hyɛ nɔ́ nɛ ha e ba ja.

Israelbi ɔmɛ ngɛ nga a nɔ be saii ji nɛ ɔ nɛ. Ni komɛ ngɛ mabi ɔmɛ a kpɛti nɛ́ a susu kaa e sɛ nɛ Mose nyɛɛɔ ma a hɛ mi, nɛ e sɛ kaa Aaron hu yeɔ osɔfo nɔkɔtɔma. Kora, Datan, kɛ Abiram kɛ ma a nimeli 250 ji nihi nɛ ná susumi nɛ ɔ nɛ. Mɛ tsuo a ba Mose ngɔ nɛ a ba de lɛ ke: ‘Mɛni heje nɛ nyɛ ngɛ nyɛ he nɔ woe ngɛ wa nɔ kikɛ ɔ?’

Mose de Kora kɛ e se nyɛɛli ɔmɛ ke: ‘Hwɔɔ mɔtu ɔ, nyɛɛ ngɔ ngɛyuhi nɛ nyɛɛ ngɔ tsopa kɛ he via kɛ wo mi. Lɔɔ se nyɛɛ ngɔ kɛ ba Yehowa kpe he bo tsu ɔ nya. Wa maa na nɔ nɛ Yehowa maa hla.’

E nɔ jena a, Kora kɛ e he piɛɛli 250 ɔmɛ ba kpe he bo tsu ɔ nya. Nihi babauu nɛ fĩ a se ɔ hu piɛɛ a he. Yehowa mi mi fu wawɛɛ. Mose de ma a ke: ‘Nyɛɛ hɛ kɛ je nimli yayami nɛ ɔmɛ a he kɛ ya se. Nɛ nyɛ ko ta a nɔ́ ko nɔ́ ko he.’ Ni ɔmɛ bu tue, nɛ a hɛ kɛ je Kora, Datan kɛ Abiram bo tsu ɔmɛ a he.

Kɛkɛ nɛ Mose de ke: ‘Enɛ ɔ nyɛɛ kɛ maa le nɔ nɛ Yehowa hla lɛ. Zugba a ma bli e nya mi nɛ e maa mii nimli yayami nɛ ɔmɛ.’

Benɛ Mose tu munyu ɔ ta nɔuu kɛkɛ nɛ zugba a mi gba enyɔ. Kora bo tsu ɔ kɛ e nɔ́ tsuaa nɔ́, kɛ Datan kɛ Abiram kɛ nihi nɛ piɛɛ a he ɔ tsuo pɛpɛɛpɛ sɛ zugba a mi, nɛ zugba a nya nga wo a yi. Benɛ mabi ɔmɛ nu ni ɔmɛ nɛ zugba a ngɛ mɛ miie ɔ a ngmlaa kpami ɔ, a de ke: ‘Nyɛɛ ha waa tu fo, konɛ zugba a ko mii wɔ hu!’

Kora kɛ e se nyɛɛli 250 ɔmɛ ngɛ kpe he bo tsu ɔ nya kpamisa. Lɔɔ he ɔ, Yehowa ha la ba sã mɛ tsuo. Jehanɛ se ɔ, Yehowa de Aaron bi Eleazar kaa e ya muɔɔ gbogboe ɔmɛ a ngɛyu ɔmɛ nɛ́ e kó mɛ tɛtlɛɛ kɛ ha afɔle sami latɛ ɔ he. Afɔle sami latɛ nɔ hami nɔ́ nɛ ɔ maa pee kɔkɔ bɔmi nɔ́ kɛ ha Israelbi ɔmɛ, kaa e sɛ nɛ nɔ kpa ko yeɔ osɔfo ha Yehowa pe Aaron kɛ e bimɛ ɔmɛ.

Se Yehowa suɔ nɛ́ a na faii kaa Aaron kɛ e bimɛ ɔmɛ pɛ ji nihi nɛ e hla kaa a ye osɔfo. Enɛ ɔ he ɔ, e de Mose ke: ‘Ha nɛ Israel wɛtsoyi ɔmɛ tsuo nɛ́ a ngɔ a dɛma tso ɔmɛ kɛ ba. Ha nɛ Aaron nɛ ngɔ e tso ɔ kɛ ba ngɛ Levi wɛtso ɔ biɛ mi. Jehanɛ ɔ, moo muɔɔ tso ɔmɛ kɛ pue somi daka a hɛ mi ngɛ kpe he bo tsu ɔ mi. Nɔ nɛ ma hla kaa ye we osɔfo ɔ, e tso ɔ ma tsɛ̃ mɔmɔ.’

E nɔ jena benɛ Mose ya hyɛ ɔ, Aaron dɛma tso ɔ tsɛ̃ mɔmɔ nɛ e wo tso yiblii fufuihi hulɔ! Lɔɔ he ɔ, tse o na yi mi tomi heje nɛ Yehowa ha Aaron tso ɔ tsɛ̃ mɔmɔ ɔ?