HANAWANG cahu sine tö, kola eng me hamë wene saked ka hmedr. Celë hi sine tö i Arona. Caasi hi la jidri ne eng me wa la tö i Arona! Tro sa ce wang la kepin.

Nango qea ha la hnei angetre Isaraela hna tro ngöne la hnapapa. Hetrenyi thene la nöje Isaraela, la angetre xele matre tro Mose a tan la nöj, nge Arona troa huuj ka sisitria. Kora la ketre ka sine la lapa cili, nge kola ce xöl me angeic hnei Dathana me Abirama me 250 lao hene nöj. Angatr a tro pi koi Mose me qaja koi nyidrë ka hape: ‘Pine nemen matre epone a adraië epone kö hui eahun?’

Öni Mose koi Kora me itre sine xöle i angeic ka hape: ‘Ame elany tro nyipunie a isa xomi trepene eë, me jegöi sinöe ka pui loi kow. Thupene lai, nyipunie a isa tro fë pi e kolemi ngöne la uma ne heta i Iehova. Nge tro sa wang e cili, la hnei Iehova hna troa iën.’

Elanyi hë, kola traqa hnei Kora memine la 250 lao sine xöle i angeic kowe la uma ne heta. Hetrenyi fe la itre xan, ka hane traqa troa nyixöle i angatr. Atraqatr la elëhni Iehova. Kola qaja hnei Mose ka hape: ‘Kötre pi nyipunie qa ngöne la itre uma maano ne la itre atr ka ngazo celë. The ketre kö la itre ewekë i angatr.’ Kola dreng hnene la itre atr, nge angatr a isa kötre pi qa ngöne la itre uma maano i Kora me Dathana, me Abirama.

Thupene lai, Mose a qaja ka hape: ‘Drei la hatren matre tro nyipunie a wanga atrehmekun la itre atr hnei Iehova hna iën. Tro ha nganga la hnadro me ulume la itre atr ka icilekeu.’

Mose petre hi a fenesi ju hna ithanata, ene pe nganga pi hi la hnadro. Ame hna ulume asë la uma maano i Kora me itre ewekë i angeic, ketre tui Abirama me Dathana me itre lapa i angatr, nge humu hmaca ju hi la hnadro hui angatr. Ame la kola dreng hnene la nöj la kola treij me mala la itre ka icilekeu hnine la hnadro, ene pe angatr a isuenyi me hape: ‘Ikötrenyi jë! Wanga hane pi fe ulumi së hnene la hnadro!’

Ame Kora memine la itre sine xöle i angeic ka ala 250, tre, angatr pala hi a cile ezin la uma ne heta. Ame hnei Iehova hna axulun la eë, ene pe meci asë pi angatr hna dreuth. Nge Iehova a upe la nekö i Arona ene Eleazara, troa xome la itre trepene eë ne la itre hna humuth, me nyi sine etë matre troa kelem la ita ne huuj. Celë hi ewekë la nyine hatren koi angetre Isaraela, matre troa amekunë angatr laka, Arona hmekuje hi me itre nekö i angeic la ka ijij, troa cilën la hnëqa ne la itretre huuj koi Iehova.

Ngo Iehova pala kö a ajan troa amamane hnyawa ka hape, Arona me itre nekö i angeic, la itretre huuj hnei Nyidrë hna iën. Haawe, öni Nyidrë koi Mose ka hape: ‘Sipone jë kowe la itre tan la itre tribu troa isa traqa fë la itre sine tö i angatr. Ame kowe la tribu i Levi, tre, tro Arona a traqa fë la tö i angeic. Nge tro eö a amë la itre tö asë cili hnine la uma ne heta, qëmeken la pua ne isisinyikeu. Nge tro la sine tö ne la atr hnenge hna iën a eng.’

Ame hë elany, ame la Mose a tro troa wang la itre sine tö, enge menu hë, nge wa wene saked ka hmedre fe hë la tö i Arona! Matre hapeu, trotrohnine hë nyipunieti enehila la kepin matre Iehova a kuca la iamamanyikeu celë?