A FILƐ bere nin ye feerenw bɔ ka amandiyiridenw kɛ fɔɔ ka mɔ. Arɔn ka bere lo. O feerenw ni yiridenw bɔra Arɔn ka bere kan suu kelen dɔrɔn na! An k’a filɛ mun na o kɛra.

Israɛldenw ye wagati dɔ kɛ yaalayaala la kongokolon kɔnɔ. U cɛma, a tun man di mɔgɔ dɔw ye ko Musa ka kɛ u ɲɛminɛbaga ye ani ko Arɔn ka kɛ sarakalasebagaw kuntigi ye. Kore ye o mɔgɔw dɔ ye, ka fara Datan, Abiramu ani jama kuntigi mɔgɔ 250 kan. Olu bɛɛ nana k’a fɔ Musa ye ko: ‘Mun na aw b’aw yɛrɛ bila an kun na.’

Musa y’a fɔ Kore n’a kɔmɔgɔw ye ko: ‘Sini sɔgɔma, aw ka wusulandagaw ta ka wusulan kɛ u kɔnɔ. O kɔ, aw ka na Jehova ka fanibugu kɔnɔ. An bena a ye Jehova bena mɔgɔ min sugandi.’

O dugusagwɛ, Kore n’a kɔmɔgɔ 250 nana Jehova ka fanibugu kɔnɔ. Mɔgɔ wɛrɛw fana nana caaman ka fara u kan. Jehova dusu dimina kosɔbɛ. Musa y’a fɔ ko: ‘Aw ka aw mabɔ mɔgɔ jugu nunu ka fanibuguw la. Aw kana maga u ka fɛɛn foyi la.’ Jama ye mɛnni kɛ ani u y’u mabɔ Kore, Datan ni Abiramu ka fanibuguw la.

O kɔ, Musa y’a fɔ ko: ‘Jehova ye mɔgɔ min sugandi aw bena o lɔn nin le fɛ. Dugukolo bena pɛrɛn ka mɔgɔ jugu nunu kunu.’

Musa tilatɔ kuma na dɔrɔn, dugukolo daa yɛlɛla. Kore ka fanibugu n’a kɔnɔfɛnw ani Datan, Abiramu n’u somɔgɔw jigira dugukolo kɔnɔ ani a datugura u kan. Jama ye o mɔgɔw jigitɔ kulekan mɛn minkɛ, u kulera ko: “An ka boli, n’o tɛ dugukolo bena an fana kunun dɛ!”

Kore n’a kɔmɔgɔ 250 bele tun be fanibugu daa la. Ayiwa, tasuma bɔra Jehova fɛ ka na u bɛɛ jɛni k’u ban pewu. O kɔ, Jehova y’a fɔ Arɔn dencɛ Eleyazari ye ko a ka wusulandaga nunu cɛ k’u dilan ka kɛ sarakabɔlan datugulan ye. O sarakabɔlan datugulan tun bena kɛ tagamasiɲɛ ye Israɛldenw fɛ k’u lasɔmi ko mɔgɔ si man kan ka saraka lase Jehova ma ni Arɔn n’a dencɛw tɛ.

Nka, Jehova tun b’a fɛ k’a yira ka gwɛ tugun ko ale ye Arɔn n’a dencɛw lo sugandi k’u kɛ sarakalasebagaw ye. O kama, a y’a fɔ Musa ye ko: ‘A fɔ Israɛl bɔnsɔnw kuntigiw ye k’u bɛɛ kelen kelen ka na n’a ka bere ye. Levi bɔnsɔn na, a to Arɔn ka na n’a ka bere ye. O kɔ, i k’o berew bɛɛ bila Jehova ka fanibugu kɔnɔ, layidu tagamasiɲɛ kɛsu ɲɛfɛ. Ne ye cɛɛ min sugandi k’a kɛ sarakalasebaga ye, ale lo ka bere bena feeren bɔ.’

O dugusagwɛ, Musa tagra filɛri kɛ, a y’a ye ko Arɔn ka bere ye feerenw bɔ ka amandiyiridenw kɛ fɔɔ ka mɔ! Ayiwa, i y’a faamu sisan fɛɛn min kama Jehova y’o kabako kɛ wa?