Kukwe kira 39

Krimana Aaronkwe blü namani

KRI blü bätä almendro ngwä tain nirien kribätä mike ñärärä. Krimana ye Aaronkwe. ¡Kri blü aune kri ngwä tain ye ririabare köböitibe deu! Ñobätä ani mike ñärärä.

Nitre Israel nänbare kä kabre te kä ngwarbe nötare yebiti. Nitre ruäre ñaka tö namani Moisés tuai ji ngwen käne, aune ñaka tö namani Aarón tuai nemen sacerdote bäri kri. Coré, Datán bätä Abiram käkwe ja töi mikani ye erere, aune nitre 250 ji ngwanka käne töi namani erere arato. Nitre jökrä ne käkwe niebare Moisés ie: ‘¿Ñobätä mätä ja mike bäri kri nun jökrä biti ta?’

Moisekwe niebare Coré bätä nitre nänkä ben ie: ‘Jetebe dekä munkwe jondron incienso kukwakrä yete incienso mika. Biti mun jata tabernáculo Jehovakwe yete. Niarakwe nire diainkä ye rabai gare nie.’

Jädrinaine Coré bätä nitre 250 nänkä ben nükani tabernáculo yete. Nitre mada kwati nükani dimike. Jehová namani rubun krubäte. ‘Kä mikekä nitre töi käme yebätä,’ niebare Moisekwe. ‘Jondron kwetre yebätä mun ñan kise mika.’ Nitre käkwe mikani täte, aune kä mikaninkä kwetre Coré, Datán bätä Abiram yebätä.

Moisekwe niebare mada: ‘Kukwe nebiti nire diainkä Jehovakwe ye rabai gare muen. Kä tibien ngetrai aune nitre töi käme ye ñaikä kwe.’

Moisés blitabare täte aune, kä tibien ye ngetrani. Coré, Datán, Abiram bätä jondron kwetre aune nitre mräkä nänkä ben ye nikani nguse, aune dobro ye ngätäninta jai niaratre yebiti. Nitre nikani nguse ye kukwe juruabare nitre mräkä ie angwane, niebare kwetre ja dibiti: ‘¡Ngitie! ¡Dobro raba ni ñainkä arato!’

Coré bätä nitre 250 nänkä ben nämene tabernáculo ye ken. Yebätä Jehová ñukwä juani, aune jökrä nukwani. Biti Jehová niebare Aarón monsoi Eleazar ie, jondron rä mane ngwä nitre ngwakare kwe, yebiti kä ükaninte jondron kukwakrä ye jue krä chi sribedre kwe niebare ie. Kä ükaninte jondron kukwakrä jue sribebare ye nämene mike gare nitre Israel ie, Aarón bätä monsotre kwe ye aibe rabadre sacerdote Jehová kräke.

Akwa Jehovakwe Aarón bätä monsotre kwe kädekani sacerdote ye tö namani mikai gare metre. Yebätä niebare kwe Moisés ie: ‘Nitre Israel juta kwatire kwatire jie ngwanka ye jatadre iti krimana kwe ngwena. Nitre Leví mräkä ye kräke Aarón jatadre krimana ngwena. Biti krimana kratire kratire ye mä mika tabernáculo yete, kaja deme ye känenkri. Nire diainkä tikwe ji ngwankäre käne, ye krimana kwe blü rabaikä.’

Jädrinaine Moisés nikrabare aune, ¡krimana Aaronkwe ye blü namani bätä almendro ngwä tain ririabare kri yebätä! ¿Ñobätä Jehová krimana Aaronkwe mikani blü nemen nibira gare mäi?

Números 16:1-49; 17:1-11; 26:10.