Okati kaAron make hapa ozongara
EHUNGI 39
Okati kaAron make hapa ozongara
TARA ozongara novihape mbi mavi hapa kokati inga. Inga okati kaAron. Ozongara novihape mbi vya hapere kokati kaAron mongurova imwe uriri. Indjeye tu tare kutja omena ratjike.
Ovaisrael va takauka mokuti onguza oruveze orure. Ovandu aave munu kutja Moses ka sokurira omunane wawo, nu Aron ka sokurira omupristeri omunene wina. Korak wa ri umwe wawo ngwee ripura omuano mbwi, na wina Datan na Abiram novanane 250 wotjiwaṋa. Owo avehe ve ya ku Moses nave tja: ‘Omena ratjike eṋe tji mamu ritongamisa kombanda yetu?’
Moses wa raera Korak novakongerere ve: ‘Muhuka tooreye ovikangero vyokutwimisa nu mu twe mo ovyomoro omuwa. Okuzambo indjeye kondanda yaJehova tu mune kutja ouṋe Jehova ngu ma toorora.’
Eyuva ependukirwa Korak novakongerere ve 250 ve ya kondanda yaJehova. Ovengi varwe ve ya okuvepa oruvara. Jehova wa pindikire tjinene. Moses arire tja tja: ‘Zapoeye pozondanda zovarumendu ovarunde mba, nu amu ṱunu kotjiṋa ngamwa tji tji ri otjawo.’ Ovandu va puratena, nu ave zapo pozondanda zooKorak, Datan na Abiram.
Okuzambo Moses a tja: ‘Ku imbi eṋe mamu tjiwa kutja Jehova wa toorora uṋe. Ehi mari paturuka nari ṋiṋa ovarumendu imba ovavi.’
Kombunda yaMoses tja mana okuhungira, ehi ra paturuka. Ondanda yaKorak noviṋa vye na Datan na Abiram na imba ova puna wo va mosukira kehi yehi, nehi re ve vandeka. Ovandu tjiva zuva ondjuriro yaimba mbu mave mosukire mehi, va ravaera nai: ‘Tupukeye, ehi tjapo wina ngaari tu ṋiṋa!’
Korak novakongorere ve 250 ngundee va ri meṋe yondanda yomerikotameno. Kunai Jehova wa hindire omuriro, nu avehe va pira mbo. Okuzambo Jehova wa raera omuzandu waAron, Eleasar, okutoora ovikangero vyokutwimisa omuriro vyovarumendu ovaṱi nu ma ungure po otjikutjire otjipepu kotjipunguhiro. Otjikutjire tjotjipunguhiro hi matji sokurira erakiza kOvaisrael kutja kape nomundu warwe pendje na Aron novazandu ve ngu ma sokurira omupristeri waJehova.
Nungwari Jehova aa vanga okutjita ongahukiro kutja wa toorora Aron novazandu ve okurira ovapristeri. Okutja eye wa raera Moses: ‘Raera omunane auhe okuza momuhoko waIsrael kutja ve ete outi wawo. Komuhoko waLevi, Aron nga ete okati ke. Nu outi auhe mbwi twa mondanda yomerikotameno momurungu wotjipwikiro tjomerikutiropamwe. Nokati komurumendu ngu me toorora make hapa ozongara.’
Indu Moses tja katara ependukirwa omuhuka omunene, okati kaAron ka hapere ozongara novihape! Hapo nai ove mo munu kutja ongwaye Jehova tja tjita kutja okati kaAron ke hape ozongara?
