TAQSIṬ TIS 39

Yeǧǧuǧeg uɛekkaz n Haṛun

MUQEL ijeǧǧigen d lluz yewwan i d-​yemɣin deg uɛekkaz-​agi. D aɛekkaz n Haṛun. Ijeǧǧigen d lfakya-​yagi yewwan ffɣen-​d seg uɛekkaz n Haṛun deg yiwen yiḍ kan! Amek i d-​yeḍra waya?

Iɛedda kra n lweqt, At Isṛayil mazal-​iten ţmenṭaren deg uneẓruf. Kra seg-​sen ur uminen ara belli Musa d amwellah yelhan. Ur ḥsiben ara diɣen Haṛun d lmuqeddem ameqran. Quraḥ d yiwen seg wid yeţxemmimen akka. Ddan diɣen yid-​es Datan, Abiram akk-​d 250 n yergazen yellan d imeqranen n wegdud. Ṛuḥen lwaḥid ɣer Musa, nnan-​as: ‘Acuɣer i tessemɣarem iman-​nwen fell-​aneɣ?’

Musa yenna i Quraḥ ţ-​ţerbaɛt-​is: ‘Azekka ṣṣbeḥ ddmet timbexṛin, tezzuzzrem fell-​asent lebxuṛ. Imiren aset-​ed ɣer uqiḍun imqeddes. A nwali anwa ara yextiṛ Yahwa.’

Azekka-​nni ṣṣbeḥ, Quraḥ d 250 n yergazen yeddan yid-​es ṛuḥen ɣer uqiḍun imqeddes. Aṭas n yemdanen nniḍen i geddan yid-​sen akken a sen-​fken afus. Yahwa yerfa aṭas. Dɣa Musa yenna: ‘Beɛdet akkin ɣef iqiḍunen n yergazen-​agi imcumen. Ur ţnalet acemma seg wayla-​nsen.’ Agdud issemḥess, dɣa iwexxeṛ ɣef iqiḍunen n Quraḥ, Datan akk-​d Abiram.

Umbeɛd Musa yenna: ‘S wannect-​a ara twalim anwa i gextaṛ Yahwa: lqaɛa a d-​teldi imi-​s yerna aţ-​ţessebleɛ yir irgazen-​agi.’

Akken kan yekfa Musa ameslay, teldi lqaɛa, tessebleɛ aqiḍun n Quraḥ d wayen akk yesɛa. Tessebleɛ daɣen Datan, Abiram d wat yexxamen-​nsen. Umbeɛd lqaɛa tuɣal fell-​asen. Mi slan i leɛyaḍ n wigad i tečča lqaɛa, At Isṛayil ţsuɣun, qqaren: ‘Tarewla neɣ m’ulac a ɣ-​tečč lqaɛa ula d nekni!’

Ma d Quraḥ d 250 n yergazen yeddan yid-​es mazal-​iten bedden ɣer tama n uqiḍun imqeddes. Imiren-​nni kan Yahwa iceggeɛ-​ed times i ten-​yeččan akken ma llan. Umbeɛd Yahwa yenna i Ilɛaẓar, mmi-​s n Haṛun, ad ikkes timbexṛin n lmeggtin-​nni, ad ixdem yis-​sent tilwiḥin swayes ara iɣumm aɛalṭar. Aɣummu-​yagi ɣef uɛalṭar ad yili d limaṛa ara d-​ismektin i wat Isṛayil belli ur yezmir ḥedd ad iṭṭef amkan n lmuqeddem zdat n Yahwa, siwa Haṛun d warraw-​is.

Lameɛna Yahwa yebɣa ad issefhem akken ilaq i wegdud belli d Haṛun d warraw-​is i gextaṛ ad ilin d lmuqeddmin. Ihi yenna i Musa: ‘Ameṛ i uqerru n mkul lɛeṛc a d-​yawi aɛekkaz-​is. Ameṛ diɣen i Haṛun, yellan si lɛeṛc n Lewwi, a d-​yawi aɛekkaz-​is ula d neţţa. Umbeɛd, ssers iɛekkzan-​agi meṛṛa deg uqiḍun imqeddes, zdat n usenduq n leɛqed. D aɛekkaz n win ara xtiṛeɣ ad yuɣal d lmuqeddem ara yeǧǧuǧgen.’

Azekka-​nni ṣṣbeḥ, iṛuḥ Musa ad imuqel, yufa aɛekkaz n Haṛun mɣin-​d deg-​s ijeǧǧiǧen d lluz yewwan. Tfehmeḍ tura acimi yeǧǧuǧeg uɛekkaz n Haṛun?

Aneẓruf 16:1-49; 17:1-11; 26:10.