YU DAT u. Ndai dawhkrawng shing nrai sumdoi hta, myin ai batan si hte, nampan ni pu tsawm nga ai. Ndai gaw Arun a dawhkrawng re. Arun a dawhkrawng lana mi na laman, asi si, apu pu wa ai. Hpa majaw re ai hpe yu yu ga.

Israela masha ni gaw nam mali hta e, kayin hkawm nga ai tsawm ra na sai. Masha nkau mi Mawshe gaw ningbaw nmai galaw sai. Arun mung hkinjawng agyi n-galaw ging sai, nga nna myit la ma ai. Dai zawn myit la ai masha ni hta Kora mung lawm ai. Dahtan, Abira hte ningbaw marai 250 ni mung dai hte maren myit la ma ai. Ndai masha ni mahkra Mawshe hpang de sa wa nna: ‘Anhte a ntsa e, nan nau gaw hpa rai nna tinang a hkum hpe shagrau la nga myit ta?’ nga nna tsun ai.

Mawshe gaw Kora hte shi a hpang hkan ai ni hpe: ‘Hpawt de wan ban hta law ban bang nna, la sa wa mu; Yehowa a nawku sum de sa wa marit, Yehowa kadai hpe lata la na re ai lam yu yu ga,’ nga nna tsun ai.

Hpang shani e, Kora hte shi a hpang hkan ai masha 250 naw ku sum de sa wa ma ai. Shanhte hpe madi shadaw ai masha law law sa wa ma ai. Yehowa mung grai matsin pawt ai. ‘Dai nhkru ai masha ni a sum hte, tsan tsan nga mu, shanhte a arung arai hpe hkum hkra mu,’ nga nna Mawshe tsun ai. Masha ni mung madat nna, Kora, Dahtan, Abira ni a sum hte tsan tsan nga ma ai.

Bai Mawshe gaw: kadai mahtang hpe Yehowa lata la ai lam ndai hku nna chye lu na re; lamu ga gaw ga wa nna ndai nhkru ai masha ni hpe, mayu kau na nga nna tsun ai.

Mawshe tsun ngut ai hte, lamu ga gaw ga wa ai. Kora a sum hte shi a arai ni, bai nna Dahtan, Abira hte shi a masha ni hpe, aga e mayu kau ai. Dai hpang e aga gaw bai chyip mat wa ai. Aga e mayu kau hkrum ai ni jahtau ai, nsen hpe na yang masha ni gaw, ‘hprawng saga! Anhte hpe mung mayu kau na re,’ nga nna jahtau ma ai.

Kora hte shi a hpang hkan ai masha 250 ni gaw, naw ku sum makau e, naw nga nga ma ai. Dai rai nna Yehowa gaw wan hpe dat dat ai. Shanhte mahkra wan hkru nna si mat ma ai. Dai hpang Yehowa gaw, Arun a kasha Eleaza hpe tsun ai. Si mat ai masha ni a ban hpe la nna, tawn hkungri magap na matu, hpri pa byin hkra galaw u; Ndai tawn hkungri magap gaw Arun hte Arun a kasha ni hta lai nna kadai mung Yehowa a hkinjawng n-galaw lu ai lam israela masha ni hpe sadi jaw ai lam re.

Shing rai Yehowa gaw Arun hte shi a kasha ni hpe chyu sha hkinjawng agyi lata tawn ai lam hpe grai dan leng shangun mayu ai. Dai majaw Mawshe hpe tsun ai: ‘Israela amyu lakung shagu hta na ningbaw shagu hpe dawhkrawng langai hpra la sa wa shangun u; Lewi amyu lakung na matu, Arun hpe shi a dawhkrawng la sa wa shangun u; Dai hpang dawhkrawng shagu hpe naw ku sum kata na ga shaka sumpu a man e, tawn da lu na; hkinjawng galaw na matu ngai lata ai wa a dawhkrawng gaw, nampan pu pu wa na ra ai,’ nga nna tsun ai.

Hpang jahpawt e, Mawshe shan yu ai shaloi, Arun a dawhkrawng hta nampan pu pu ai hte, myin ai batan si mung si nga ai. Dai majaw Arun a dawhkrawng hpe, hpa majaw Yehowa nampan pu pu shangun ai lam hpe nanhte chye na sai kun?