SAʼ LI eetalil wank jun li xuqʼ kiʼatzʼumak ru. Aʼan li xxuqʼ laj Aaron. Chiru jun qʼoqyink ajwiʼ kiʼatzʼumak ru! Qilaq chanru kikʼulmank aʼin.

Naabʼal chihabʼ keʼwank laj Israel saʼ li chaqichʼochʼ. Abʼan laj Core, laj Datan, laj Abiram ut 250 ebʼ aj jolominel inkʼaʼ keʼraj naq laj Moises tjolominq rehebʼ, chi moko keʼraj ta naq laj Aaron twanq choʼq aj tij. Joʼkan naq keʼxye re laj Moises: ‹Kʼaʼut nakaakʼe aawankil saʼ qabʼeen?›

Laj Moises kixye rehebʼ: ‹Chalqex wulaj eqʼla saʼ Rochoch li Jehobʼa ut teekʼam chaq xnaʼaj leepom ut teekʼe li pom chisaʼ. Ut tqil ani laj jolominel tixsikʼ ru li Jehobʼa›.

Naq kisaqewk laj Core ut ebʼ li 250 chi winq keʼwulak saʼ Rochoch li Jehobʼa ut naabʼalebʼ chik keʼokenk chirixebʼ. Kʼajoʼ naq kichalk xjosqʼil li Jehobʼa. Joʼkan naq laj Moises kixye re li tenamit: ‹Elenqex chiru li rochoch laj Core, laj Datan ut laj Abiram ut maakʼaʼ kʼaru rehebʼ teechʼeʼ›. Li tenamit kiʼabʼink chiru laj Moises.

Chirix chik aʼan kixye laj Moises: ‹Rikʼin aʼin teenaw ani tixsikʼ ru li Jehobʼa. Tixte ribʼ li chʼochʼ ut aran teʼkamq li winq aʼin›.

Naq laj Moises kiraqeʼk chi aatinak kixte ribʼ li chʼochʼ. Laj Datan, laj Abiram, ebʼ li xjunkabʼal ut chixjunil li wank saʼebʼ li rochoch kiʼok saʼ li jul. Naq kikʼulmank aʼin laj Core inkʼaʼ kikamk kaʼajwiʼ li xjunkabʼal ut ebʼ li kʼa ru re xkohebʼ saʼ li jul. Chirix chik aʼan, kixtzʼap ribʼ li chʼochʼ. Naq keʼxjap rehebʼ li keʼtʼaneʼk saʼ li jul, ebʼ li keʼabʼink rehebʼ keʼxye: ‹Elenqo arin, xbʼaan naq naru ajwiʼ tookamq saʼ li jul!›

Laj Core ut li 250 chi winq toj wankebʼ chiru li Rochoch li Jehobʼa. Joʼkan naq li Jehobʼa kixtaqla chaq xaml saʼ xbʼeenebʼ ut chixjunilebʼ keʼkamk. Chirix chik aʼan li Jehobʼa kixye re laj Eleazar, ralal laj Aaron, naq tixxok xnaʼajebʼ li xpom ebʼ li keʼkamk ut rikʼin aʼan tixyiibʼ li perpookil chʼiichʼ re xtzʼapbʼal xbʼeen li naʼaj bʼarwiʼ nekeʼxkʼat li pom. Li perpookil chʼiichʼ aʼan reetalil naq kaʼajwiʼ laj Aaron ut ebʼ li ralal teʼkʼanjelaq choʼq aj tij chiru li Jehobʼa.

Li Jehobʼa naraj naq li tenamit tixnaw naq kaʼajwiʼ laj Aaron ut ebʼ ralal keʼsikʼeʼk ru choʼq aj tij. Joʼkan naq kixye re laj Moises: ‹Li nekeʼjolomink re li junjunq chi teep teʼxkʼam chaq xxuqʼebʼ. Laj Aaron tixkʼam chaq ajwiʼ li xxuqʼ choʼq xteepal laj Levi. Ut taakʼe ebʼ li xuqʼ chiru xkaaxil li sumwank. Li xxuqʼ li winq li tinsikʼ ru choʼq aj tij aʼan t-atzʼumak ru›.

Naq kisaqewk laj Moises kiril naq li xxuqʼ laj Aaron kiʼatzʼumak ru. Ma nakaanaw anaqwan kʼaʼut naq li Jehobʼa kixkʼe chi atzʼumak li xxuqʼ laj Aaron?