RORA mahũa na matunda meru ma ndothi marakũra rũthanju-inĩ. Rũrũ nĩruo rũthanju rwa Haruni. Mahũa maya na matunda maya meru maakũrire ũtukũ o ũmwe rũthanju-inĩ rwa Haruni. Reke tũmenye gĩtũmi.

Rĩu Aisrali nĩ macangacangĩte werũ-inĩ gwa kahinda wee. Andũ amwe matirona Musa agĩrĩire gũtuĩka mũtongoria wao, o na kana Haruni atuĩke mũthĩnjĩri-Ngai-mũnene. Kora nĩwe ũrona arĩguo, o ũndũ ũmwe na Dathani, Abiramu hamwe na atongoria a andũ 250. Acio othe mokire makĩĩra Musa ũũ: ‘Rĩu ningĩ makĩria ũkwenda gwĩtũũgĩria wĩtue mũnene witũ?’

Musa akĩĩra Kora na arũmĩrĩri ake: ‘Rũciũ kĩroko-rĩ, oyai ngĩo cianyu na mwĩkĩre ũbumba. Mũcoke mũke hekarũ-inĩ ya Jehova. Nĩ rĩo tũkũona ũrĩa Jehova e gũthura.’

Mũthenya ũyũ ũngĩ Kora na arũmĩrĩri ake 250 magĩũka hekarũ-inĩ. Angĩ aingĩ magĩũka kũnyita gĩkundi kĩu mbaru. Jehova akĩrakara mũno. Nake Musa akiuga, ‘Eherai haha hema-inĩ cia andũ aya aaganu. Mũtikanahutie kĩndũ o na kĩmwe kĩao.’ Andũ magĩthikĩrĩria, makĩehera gĩikaro-inĩ kĩu gĩa Kora, Dathani na Abiramu.

Nake Musa akiuga atĩrĩ: ‘Ũndũ ũyũ nĩguo ũkũmenyithania nũũ Jehova aathurĩte. Thĩ ĩgwathamia kanua kayo, ĩmerie andũ aya aaganu.’

Musa arĩkia kwaria o ũguo-rĩ, thĩ ĩgĩatũka. Hema ya Kora na indo ciake ciothe na Dathani na Abiramu na arĩa othe marĩ hamwe nao makĩhorokera nayo thĩ ĩkĩmathika. Rĩrĩa andũ maiguire kĩrĩro rĩrĩa andũ mameragio nĩ thĩ-rĩ, makĩanĩrĩra makiuga: ‘Ũrai! Thĩ yahota gũtũmeria o na ithuĩ!’

Kora na arũmĩrĩri ake 250 maarĩ hakuhĩ na hekarũ. Rĩu Jehova agĩtũma mwaki, na othe makĩhĩa magĩthira. Jehova akĩĩra Eleazaru mũrũ wa Haruni oe ngĩo icio cia gũcinĩrũo ũbumba cia andũ acio makuĩte na athondeke kabati gaceke gakũhumbĩra kĩgongona. Gĩkunĩko gĩkĩ gĩa kĩgongona gĩgũtuĩka mũkana harĩ Aisiraeli atĩ hatirĩ mũndũ ũngĩ tiga Harũni na ciana ciake mangĩatuĩkire athĩnjĩri-Ngai a Jehova.

Jehova arenda kũonania wega atĩ no Harũni na ciana ciake tu aathurĩte matuĩke amũthĩnjĩri. Kwoguo akĩĩra Musa: ‘Ĩtia atongoria a nyũmba cia Isiraeli o mũndũ arehe rũthanju rũake. Nyũmba ya Lawii, Haruni arehe rũthanju rũake. Nacio thanju icio ũciige hekarũ-inĩ mbere ya ithandũkũ rĩa kĩrĩkanĩro. Rũthanju rũa mũndũ ũrĩa thurĩte atuĩke mũthĩnjĩri rũgũkũra mahũa.’

Rũciinĩ rũrũ rũngĩ Musa arora-rĩ, hĩ, rũthanju rũa Haruni rũathundũkĩte mahũa na matunda meru ma ndothi! Rĩu-rĩ, nĩ wakĩona kĩrĩa gĩatũmire Jehova atũme rũthanju rũa Haruni rũthundũke mahũa?