AKIMONA maluba ne bipangwa bya amonde byapanga ku kano kamama nangwa’mba mukombo. Kano ko kamama ka kwa Alona. Ano maluba ne bipangwa byapya byamenene ku kamama ka kwa Alona kimye kya bufuku bumo. Twaya tumone kyalengejile.

Pa kino kimye bena Isalela saka bapitañana mu kiselebwa pa kimye kyabaya. Bantu bamo balangulukile’mba Mosesa kechi wafwainwe kwikala ntangi ne, nangwa Alona kwikala ñanga mukatampe ne. Kola, Datanyi, Abilama, ne bantangi 250 bo balangulukilenga bino. Abano bonse baishile kwi Mosesa ne kumwambila’mba: ‘Nanchi mambo ka anweba o mwilundumikila kukila atweba bonse?’

Mosesa waambijile Kola ne kipanyi kyanji amba: ‘Kesha lukelo mukashikule tumababula mukabikemo mujilo ne kutulapo byakufutumuna. Kepo mukeye ku tente wa lusambakeno wa Yehoba. Po po tukamona baji ku lubaji lwa Yehoba.’

Juba jalondejilepo lukelo, Kola ne kipanyi kyanji kya bantu 250 baishile ku tente wa lusambakeno. Ne bantu bakwabo baishile na kutundaika bano bantu. Yehoba wazhingijile bingi. Mosesa wibambijile’mba: ‘Fumaiko ku matente a bano bantu babi. Kechi mukwate ku bintu byabo nangwa ku kintu kimo ne.’ Bantu baumvwijile, ne kufumako ku matente a kwa Kola, Datanyi, ne Abilama.

Kepo Mosesa aambile’mba: ‘Pa kino kintu po po mukayuka bo atuma Yehoba. Mushiji ukasama kanwa kanji ne kwibamina bano bantu batama.’

Mosesa byo apwishishetu kwamba, mushiji walajikile. Matente a kwa Kola ne bintu byanji, Datanyi, Abilama ne bonse bo bajinga nabo batwelele panshi ne mushiji wabwelele wasambakana jibiji. Bantu byo baumvwine miteto ya boba baponejilenga mu mushiji walajikile, babijikile’mba: ‘Nyemai, kuchina’mba mushiji waketumina ne atweba!’

Kola ne kipanyi kyanji kya bantu 250 bashajile kwipi na tente wa lusambakeno. Kepo Yehoba atumine mujilo, ne bonse bapile. Kabiji Yehoba waambijile Eleaza mwana Alona amba ashikule tumababula mukachi ka mujilo twa bantu bafwile ne kwitubunda twapapakana kuba’mba twikale ke twakulamika pa kyakusokelapo bitapisho. Kino kya kulamika pa kya kusokelapo kyajinga kya kujimunako bena Isalela kuba’mba kafwako nangwa umo wafwainwe kwikala ñanga wa Yehoba ne, kana Alona ne baana banji kwapwa.

Bino Yehoba wakebele kulumbulula bulongo amba Alona ne baana banji bo bonkatu bo asajile kwikala bañanga. Kepo amwambijile Mosesa amba: ‘Ambila bakulumpe babo mwayila bikota byabo bena Isalela kuleta tumama. Kikota kya bena Levi, Alona alete kamama. Kepo mutule tuno tumama mu tente wa lusambakeno konka kulutwe ya jikwachi ja lushimuno. Kabiji aka kamama ka muntu ye nasalulula kasakusapuka.’

Mosesa byo atajile lukelo lwalondejilepo wamwene kamama ka kwa Alona kasapuka kwapanga ne bipangwa bya amonde! Nanchi pano wamona ene mambo Yehoba o alengejile kamama ka kwa Alona kusapuka nyi?