LUK di flawa ɛn di frut dɛn we de gro pan dis stik. Na Erɔn gɛt di stik. Na wan nɛt di flawa ɛn di frut dɛn gro pan Erɔn in stik! Lɛ wi si wetin mek dat apin.

Di Izrɛlayt dɛn stil de waka waka na di ɛmti land usay pɔsin nɔ go ebul de. Sɔm pan dɛn pipul ya tink se Mozis nɔ fɔ bi dɛn lida, ɛn Erɔn nɔ fɔ bi dɛn ay prist. Sɔm pan di wan dɛn we bin de tink so na Kora, Detan, Abayram ɛn ɔda 250 bigman dɛn. Dɛn ɔl kam to Mozis ɛn tɛl am se: ‘Wetin mek yu de put yusɛf pantap ɔlman?’

Mozis tɛl Kora ɛn di wan dɛn we de wit am se: ‘Tumara mɔnin una tek tin dɛn fɔ ol faya ɛn put insɛns pan dɛn. Dɔn una kam na di tɛnt usay wi de wɔship Jiova. Wi go si udat Jiova go pik.’

So di ɔda de, Kora ɛn di 250 pipul dɛn we de wit am kam na di tɛnt. Bɔku ɔda pipul dɛn kam wit dɛn fɔ sɔpɔt dɛn. Dis mek Jiova vɛks bad bad wan. Mozis tɛl di pipul dɛn se: ‘Una kɔmɔt na dɛn bad pipul ya dɛn os dɛn. Una nɔ put una an pan ɛnitin we na dɛn yon.’ Di pipul dɛn lisin to Mozis ɛn kɔmɔt na Kora, Detan ɛn Abayram dɛn os dɛn.

Dɔn Mozis tɛl dɛn se: ‘Di tin we de kam apin go mek una no di pɔsin we Jiova dɔn pik. Di grɔn go opin ɛn kɔba dɛn bad pipul ya.’

As Mozis de tɔk dɔn so, na in di grɔn opin. Kora in tɛnt ɛn ɔltin we i gɛt go insay di grɔn. Ɛn Detan ɛn Abayram ɛn ɔl di wan dɛn we de wit dɛn, go dɔŋ. Na de di grɔn kɔba dɛn. We di pipul dɛn yɛri we di wan dɛn we de go dɔŋ di grɔn de kray, dɛn bigin ala se: ‘Una lɛ wi rɔn, mek di grɔn nɔ kɔba wi!’

Kora ɛn di 250 pipul dɛn we de wit am bin de nia di tɛnt usay dɛn de wɔship Jiova. So Jiova mek faya kɔmɔt na ɛvin ɛn bɔn dɛn ɔl. Dɔn Jiova tɛl Erɔn in pikin we nem Ɛlieza, fɔ tek di tin dɛn we dɛn pipul ya bin yuz fɔ ol faya. Jiova tɛl am fɔ mɛlt dɛn ɛn kɔba di wan ol ɔlta wit am. Dis tin we go kɔba di wan ol ɔlta, go mɛmba di Izrɛlayt dɛn se na Erɔn ɛn in pikin dɛn nɔmɔ fɔ bi Jiova in prist.

Bɔt Jiova du ɔda tin bak fɔ mek di pipul dɛn no se na Erɔn ɛn in pikin dɛn nɔmɔ i dɔn pik fɔ bi prist. I tɛl Mozis se: ‘Mek wan edman pan ɔl di trayb dɛn na Izrɛl kam wit in stik. Mek Erɔn kam wit in stik fɔ di trayb we nem Livay. Dɔn, put di stik dɛn bifo di oli bɔks we de na di tɛnt usay una de wɔship. A go mek flawa gro pan di pɔsin we a pik, in stik.’

Di ɔda mɔnin we Mozis go luk, i si flawa ɛn frut dɔn gro pan Erɔn in stik! Yu dɔn no naw wetin mek flawa gro pan Erɔn in stik, nɔto so?