CHÓTSENLALAI naxó kao to almendra xi jesí koanjchá kinroale yá xokji. Jé yále Aarón. ¡Tojngo nitjen kinroanile je naxó kʼoa kao to xosíkjoan! Kataʼyala ánni nga kʼoakoansíni.

Nga je kjoatse ya tjíotsoma je chjota israelita ya ʼndekixí, tjínkʼa xi tsínti koanmenile nga je Moisés tsakasentítjon, kʼoa nga je naʼmi títjon koan Aarón. Kʼoa je xi kʼoasʼin kisikjaʼaitsjen je Coré, kʼoa kʼoati kitso Datán, Abiram kʼoa jao siento basen chjota xi nyatítjonle naxinandá. Ngatsʼi kichonrʼoe Moisés kʼoa kitsole: “Ánni nga ji ngʼa tibisejnasínilai xi ngikʼa”.

Moisés i̱ kitsole Coré kao chjota tjenngile: “Nyaon tajnjio chjoao chxoa̱ʼíno kʼoa tatioyao xongó. Kʼoa nroao i̱ ndʼianajñole Jeobá. Kʼia jchaa ʼyáni xi skoéjin Jeobá”.

Nga je koannyaonni je Coré kʼoa kao xi jao siento basen chjota tjenngile kichó ya jña tíjna ndʼianajño. Kʼoa kichotsjoá nganʼiosale xi kjaʼai. Nʼio koanjtile Jeobá. “Titjoxinlao ndʼianajñole chjota tsʼen xokjoan” kitso Moisés. “Nijmejin tsojmi xi tsʼe nikao”. Je chjota kinrʼoé, kʼoa tsakinyaxínle jña tjío ndʼianajñole Coré, Datán kao Abiram.

Xijekoan, Moisés kitso: “Kao kui jebi jchaño ʼyáni xi tíkjoejin Jeobá. Tjóxʼá nangi kʼoa skójen chjota tsʼen xokjoan”.

Kʼianga je kʼoakitso én jebi je Moisés, kitjoxʼá nangi. Je ndʼianajñole Coré, Datán, Abiram kʼoa kao chjota xi ya tjíokao kitsaosʼen nangi, kʼoa koajngo ijngokʼani nangi. Kʼianga kinrʼoé chjota nga tjíokjiʼndáxá chjota xi kiskojen nangi, kitso: “¡Tókao! ¡Tsa mai kʼoati skójenná tsandañá je nangi!”

Coré kʼoa kao xi jao siento basen chjota tjenngile tojoyasa tjío chrianle ya ndʼianajño. Kuinga jngo lʼí kisikasénsíni Jeobá, kʼoa kití ngatsʼi. Xijekoan, je Jeobá kʼoakitsole Eleazar je tile Aarón nga katabʼéxkó je chxoa̱ʼíle chjota xi kʼien kʼoa nga katasínandá kʼoa ya katasíkajon ya jña sakáson xongó. Kʼianga kui kinikajon jña sakáson xongó kui xi tsakájinkon je chjota israelita nga tojekjoan Aarón kao xtile xi naʼmi sʼin sixále Jeobá.

Tonga Jeobá koanmele nga nda kjoan katasʼejinle naxinandá nga jé Aarón kao xtile kiskoejin nga naʼmi koa̱n. Kuinga kitsosínile Moisés: “Nga jngó jngó xi nyatítjonle ntje̱le Israel katanroakao yále. Je xi tsʼe ntje̱le Leví, je Aarón katanroakao yále. Nga jngó jngó yále ya tikatui ndʼianajño jña tíjna je kaxa xi nya je kjoa xi kisʼendajin. Je yále xi naʼmi sʼin tikjoejian naxó kuinroale”.

Kʼianga kiskotsen Moisés nga koannyaonni, ¡je yále Aarón naxó tíbitjole kao to almendra xi je koanjchá! A je ʼyainda ndʼai ánni nga kʼoasʼin naxó kisikitjosínile Jeobá je yále Aarón.