EDWƐKƐ 39
Aalɔn Baka Ne Bɔle Ndotolo
NEA ndotolo ne nee alemɔn bolora ne mɔɔ efifi baka ɛhye azo la. Aalɔn baka ne ɛne. Ndotolo ne nee ma ne mɔɔ ɛbolo la rale kenle ko nɔɔzo ala! Maa yɛnlea deɛ mɔɔ ɔti ɔrale ye zɔ la.
Yizilayɛma ne mɔ ɛkpɔsɛkpɔsa fienemgbole ne anu ɛhyɛ ekyii. Menli ne bie mɔ zuzule kɛ Mosisi ɛnfɛta kɛ ɔkɛli bɛ nyunlu, anzɛɛ Aalɔn kɛyɛ ɛsɔfo kpanyinli. Ɛnee Kɔla dwenle zɔ, na zɔhane ala yɛɛ Deetan, Abaelam nee mgbanyinli 250 noko dwenlenle a. Menli ɛhye mɔ amuala rahanle hilele Mosisi kɛ: ‘Duzu ati a bɛvo bɛdɛnla yɛ muala yɛ nwo zo zɛhae a?’
Mosisi hanle hilele Kɔla nee ɔ sa zo ne mɔ kɛ: ‘Ɛhyema nwonlomɔ bɛva ahyɛnze mɔɔ bɛfa bɛkpu ɛyɛlɛ la na bɛva ɛyɛlɛ bɛgua nu. Akee bɛva bɛrɛla Gyihova ɛzonlenlɛ sua ne anyunlu. Yɛbanwu mɔɔ Gyihova baye ye la.’
Aleɛ hyenle la Kɔla nee ɔ sa zo menli 250 ne rale ɛzonlenlɛ sua ne anyunlu. Menli dɔɔnwo noko rale kɛ bɛbazi menli ɛhye mɔ adua. Gyihova vale ɛya kpole. Mosisi zele menli ne kɛ: ‘Bɛhwe bɛ nwo bɛvi amumuyɛma ɛhye mɔ ndanlɛ azua ne mɔ anwo. Bɛmmafa bɛ sa bɛka bɛ debie biala.’ Menli ne diele na bɛhwenle bɛ nwo bɛvile Kɔla, Deetan nee Abaelam ndanlɛ azua ne mɔ anwo.
Akee Mosisi se: ‘Ɛhye bamaa bɛanwu mɔɔ Gyihova ɛye ye la. Azɛlɛ ne bakpakye na yeame menli ɛtanevolɛ ɛhye mɔ.’
Mɔɔ Mosisi wiele tendɛ ala la, azɛlɛ ne kpakyele. Kɔla ɛdanlɛ sua ne nee ye ninyɛne, nee Deetan nee Abaelam nee menli mɔɔ boka bɛ nwo la kɔsɔɔti wolole azɛlɛ ne anu na ɔhedale bɛ nwo zo. Mekɛ mɔɔ menli ne dele menli mɔɔ ɛlɛwolo azɛlɛ ne anu la ɛzunlɛ ne la bɛdeanle nuhua kɛ: ‘Angɔ a angɔ o! Wɔannea a azɛlɛ ne kɛme yɛdayɛ noko o!’
Ɛnee Kɔla nee ɔ sa zo menli 250 ne tɛbɔ ɛzonlenlɛ sua ne anwo. Yemɔti Gyihova manle senle vi anwuma rayelale bɛ muala. Akee Gyihova hanle hilele Aalɔn ara nrenya Ɛlieza kɛ ɔyeye menli mɔɔ ɛwu la ɛyɛlɛkpunlɛ ahyɛnze ne mɔ na ɔbolo bɛ ɛdɛbaa na bɛava bɛaheda afɔlemokyea ne azo. Ɛhye bayɛ kɔkɔbɔlɛ amaa Yizilayɛma ne mɔ kɛ Aalɔn nee ɔ mra ne mɔ ala a ɔwɔ kɛ yɛ ɛsɔfo maa Gyihova a.
Noko akee ɛnee Gyihova kulo kɛ ɔda ye ali wienyi kɛ Aalɔn ne ɔ mra ne mɔ ala a yekpa bɛ kɛ bɛyɛ ɛsɔfo a. Yemɔti ɔhanle ɔhilele Mosisi kɛ: ‘Maa Yizilayɛ abusua kpanyinli biala ɛva ye baka ɛrɛla. Maa Aalɔn ɛva Livae abusua ne baka ɛdeɛ ne ɛrɛla. Na fa mbaka ɛhye mɔ gua ngyekyeleɛ ɛlɛka ne anyunlu wɔ ɛzonlenlɛ sua ne anu. Sonla ne mɔɔ menlea nu meye ye la baka ɛdeɛ ne bafifi.’
Aleɛ hyenle nwonlomɔ ne mɔɔ Mosisi hɔnleanle la, nea, Aalɔn baka ne ɛfefɛ nya, ɛbɔ ndotolo na yezo alemɔn ma mɔɔ ɛbolo a! Akee wɔnwu deɛ mɔɔ ɔti Gyihova manle Aalɔn baka ne bɔle ndotolo la ɔ?
