HYANDI nuyu̱ yä do̱ni ꞌne nuyu̱ yä almendra xä bo̱ ha nuni rä zaa. Gehni rä zaa rä Aron. ¡Nꞌa rä xui bi bo̱ nuyu̱ yä do̱ni ꞌne nuyu̱ yä fruta xä dää! Ma gä handihu̱ por hanja.

Yä israelita ya xä ñꞌo de gä nani ha yä yꞌotꞌä hai po ndunthi yä je̱ya. Rꞌaa enä ge rä Moises hingä ri ꞌñepi go dä gu̱tꞌä rä ꞌñuu, ha nixi ri ꞌñepi rä Aron dä ndäta majhä. Rä Kore, rä Datan, rä Abiram ꞌne mä 250 yä ñꞌo̱ho̱ nuꞌu̱ mi gu̱tꞌi rä ꞌñuu ha rä hnini, geꞌu̱ mi mbeni njabu̱. Gatꞌho gehyu̱ bä ehe ꞌne mi xipi rä Moises: “Xi nuꞌi, ¿por hanja go gi ne gi mändagihe?”.

Rä Moises bi ꞌñembi rä Kore ko nuꞌu̱ yä ñꞌo̱ho̱ mi de̱ni: “Xudi ngu xtä hyatsꞌi, ju̱hu̱ ri nju̱spihu̱, yꞌu̱thu̱ rä tꞌutsꞌi, ꞌne guä ehehu̱ ha rä tabernäkulo. ꞌNe ma gä handihu̱ toꞌo ma dä huahni Jeoba”.

Rä hyaxꞌä, rä Kore ꞌne nuꞌu̱ 250 yä ñꞌo̱ho̱ mi de̱ni bä ehe ha rä tabernäkulo ꞌne bä ehe mä ndunthi yä jäꞌi pa bi matsꞌi. Jeoba xi bi nkue̱. Rä Moises bi ꞌñenä: “ꞌUegehu̱ de yä ngu nuyu̱ yä bo̱ka ꞌne yä nduxte ñꞌo̱ho̱ ꞌne ote gi thaꞌtuäbihu̱”. Yä jäꞌi bi yꞌo̱de ꞌne bi ꞌuege de nuꞌu̱ yä ngu rä Kore, rä Datan ꞌne rä Abiram.

ꞌNepu̱ rä Moises bi ꞌñenä: “Kongehnä ma gi pädihu̱ toꞌo di huahni Jeoba. Rä hai ma dä hege ꞌne ma dä dutꞌi nuyu̱ yä bo̱ka ñꞌo̱ho̱”.

Ngu bi uadi bi ñä rä Moises, rä hai bi hege. Yä ngu ꞌne gatꞌho näꞌä mi pe̱ꞌtsi rä Kore, rä Datan, rä Abiram ꞌne nuꞌu̱ yä jäꞌi mi de̱ni, bi zo mbo rä hai ꞌne bi njotꞌi mänꞌaki näꞌä rä hai xki hege. Mi yꞌo̱de nuꞌu̱ märꞌa yä jäꞌi yä mhafi nuꞌu̱ bi zo mbo rä hai, nuꞌu̱ bi mafi ꞌne bi ꞌñenä: “¡Nextꞌihu̱! ¡Rä hai dä za dä dutꞌigihu̱ ꞌnehe!”.

Pe rä Kore ꞌne nuꞌu̱ 250 yä ñꞌo̱ho̱ mi de̱ni, mi ꞌmaitho getbu̱ de rä tabernäkulo. Hänge Jeoba bi me̱hni rä tsibi pa bi tsätꞌi gatꞌho. Nubye̱ Jeoba bi xipi rä Eliasar, näꞌä rä tꞌu̱ rä Aron ge xä muntsꞌuäbi yä nju̱spi nuꞌu̱ yä ñꞌo̱ho̱ bi du, ꞌne kongeꞌu̱ xä hyoki nꞌa rä njui xä nxini pa näꞌä rä altar. Nunä rä njui bi ꞌñuti yä israelita ge Jeoba xki huahni se̱he̱ rä Aron ꞌne nuꞌu̱ yä tꞌu̱ pa dä mpe̱fi de gä majhä.

Pe Jeoba ne dä ꞌñudi xä ñho ge xä huahni rä Aron ꞌne nuꞌu̱ yä tꞌu̱ pa dä majhä. Hänge bi ꞌñembi rä Moises: “Dä hä yä zaa kada nꞌa de nuꞌu̱ yä ñꞌo̱ho̱ di gu̱tꞌi rä ꞌñuu ha nuꞌu̱ yä tꞌu̱kä hnini ja ha Israel. Pa näꞌä rä tꞌu̱kä hnini Lebi, dä hä rä zaa rä Aron. ꞌNe guä tsogi nuꞌu̱ yä zaa ha rä tabernäkulo rꞌandi de näꞌä rä kaha de gä kohi. Näꞌä rä ñꞌo̱ho̱ xtä huahni pa dä majhä, geꞌä ma dä ndo̱ni rä zaa”.

Mi hyatsꞌi, rä Moises bi hyandi hanja näꞌä rä zaa rä Aron xki bo̱ yä do̱ni ko yä almendra nuꞌu̱ xki dää. Nubye̱ hää, ¿gi pädi por hanja Jeoba bi japi bi ndo̱ni rä zaa rä Aron?