QAWAY chay tawnaqa iklliramuspa waytachkan hinaspa poqosqa almendras rurukunatapas ruruchkan. Chayqa Aaronpa tawnanmi. ¡Chay waytakunawan rurunkunaqa huk tutallapim wiñarusqa! Qawasunchik imanasqataq.

Israel runakunaqa unaytaña chunniqpi purikachachkanku. Wakinkunaqa manam munankuchu Moises kamachikuqninku kananta nitaq Aaronpas sacerdotekunapa jefen kanantapas. Coreymi chaynataqa umacharqa, chaynataq Datanwan Abiram hinaspa 250 runakunapa jefenkunapiwan. Paykunamá Moisesta nirqaku: ‘¿Imanasqataq qamqa munaychakuchkanki runakunapiqa?’ nispa.

Moisesñataqmi Coreyta compañaqninkunatawan nirqa: ‘Paqarinmi incienso qontichinaykichikta apamuspa sansatawan inciensota churankichik. Hinaspa Jehová Diosman asuykuna karpanman apamunkichik. Payñayá akllakuchun’ nispa.

Paqarinnintinta Coreywan 250 compañaqninkunaqa Diosman asuykuna karpaman rirqaku. Wakin runakunapas rirqaku yanapaqninku hina. Chaywanmi Jehová Diosqa piñakururqa. Hinaptinmi Moisesqa nirqa: ‘Kay mana allin ruraq runakunapa karpanmanta asurikuychik. Amataq imankutapas hapiychikchu’ nispa. Chaymi runakuna Coreypa, Datanpa hinaspa Abirampa karpankumanta asurikururqaku.

Hinaptinmi Moisesqa nirqa: ‘Kunanmi yachankichik Jehová Diosqa pitam akllarqa. Allpaqa kicharikuptinmi Diosta qepanchaq runakuna wichiykunqaku’ nispa.

Tukuy chaykunata Moises rimayta tukuruptillanmi allpa kicharikuykurqa. Coreypa, Datanpa, Abirampa hinaspa yanapaqninkunapa karpankuna kapuqninkunawan allpa ukuman wichiykurqaku, hinaptinmi allpaqa kaqllamanta wichqakururqa. Wakin runakuna wichiqkunapa qaparisqankuta uyarispanku nirqaku: ‘¡Ayqekuychik! ¡Ñoqanchiktapas allpa millpuruwachwanchik!’ nispa.

Coreywan 250 compañaqninkunapas Diosman asuykuna karpanpa hichpanpiraq kachkarqaku. Chaymi Jehová Diosmanta nina rikuriramuspan llapallankuta ruparurqa. Hinaptinmi Jehová Diosqa Aaronpa churin Eleazarta kamachirqa, wañuqkunapa qontichinankunata llaspayachispa chaywan altarpa hawanman laqachinanpaq. Chayqa karqa Israelpa mirayninkunata anyananpaq Aaronpa miraynillanmanta Jehová Diospa sacerdotenkuna kanankupaq.

Jehová Diosqa qawachiytamá munan Aaronwan churinkunata sacerdote kanankupaq akllasqanta. Chaymi Moisesta nirqa: ‘Sapa ayllupa jefenyá huk tawnata apamuchunku. Leviy ayllumanta kaq Aaron tawnanta apamuchun. Chaykunataqa ñoqaman asuykuna karpapim churanki Chunkantin Kamachikuynin waqaychana baulpa ñawpaqninpi. Sacerdotepaq akllasqay runapa tawnanmi iklliramuspa waytanqa’ nispa.

Paqarinnintinta Moises qawaykuptinmi ¡Aaronpa tawnanqa waytaspa almendraskunatapas poqosqataña ruruchkasqa! ¿Musyakunkichu imanasqataq Jehová Diosqa Aaronpa tawnanta waytachisqanta?