ATAYÁÁ ri̱ʼi̱ ga̱jma̱a̱ almendra rí niʼgo̱o̱ rí nakhi̱i̱ náa ixi̱ rígi̱. Ikhaa má ixu̱u̱ Aarón. ¡Ri̱ʼi̱ ga̱jma̱a̱ xndú taun rígi̱ mbá mbruʼun nikhi̱i̱! Guʼyáá náa numuu.

Mba̱yu̱u̱ʼ tsiguʼ nijnguʼun israelitas náa ku̱ba̱ʼ gíná. Tikhun nundxa̱ʼwa̱míjna̱ dí Moisés ragíʼmaa mani̱ndxu̱u̱ xa̱bu̱ ede̱, ndí má Aarón ragíʼmaa mayeʼga edxu̱u̱ náa ndxajkun. Coré ni̱ndxu̱u̱ mbáa bi̱ nandxa̱ʼwáminaʼ xúʼko̱ kaʼnii, ga̱jma̱a̱ Datán, Abiram gajmiún 250 xa̱bu̱ ede̱ bi̱ kuwa náa xuajin. Xúgínʼ bugi̱ naguwáʼ náa Moisés ma̱ngaa nutháán: ‹Náa numuu rí natani̱ maraʼdáá wéñuʼ numaaʼ náa ikháanʼxu rá.›

Moisés naʼthúu̱n Coré gajmíi̱n xa̱bi̱i̱: ‹Gájtsii miʼcha̱ gúyá tséjui̱i̱ mu ikhí gúrajkuáa incienso. Ikhú aguwaʼ náa tabernáculo ndrígóo Jeobá. Mbuʼyáá tsáa gáyááʼ ikhaa›.

I̱mba̱ néjtsuu Coré gajmíi̱n 250 xa̱bi̱i̱ naguwáʼ náa tabernáculo. Mbaʼin eguwáʼ mu rí mumbañún. Jeobá nakiʼnáa wéñuʼ. Moisés naʼthúún: ‹Xáguanalaʼ náa mijngii guʼwún xa̱bu̱ bi̱ ra̱míjínʼ. Xúrugua̱ nditháan rí kaʼñúún ikhiin›. Xa̱bu̱ nudxawíín, ma̱ngoo natsingunʼ náa xtáa Coré, Datán ga̱jma̱a̱ Abiram.

Ikhú Moisés naʼthí: ‹Ga̱jma̱a̱ numuu rígi̱ mbu̱ya̱a̱ tsáa gáyááʼ Jeobá. Maguajan ku̱ba̱ʼ ma̱ngoo ikhí gájpatuíʼíin xa̱bu̱ bugi̱ bi̱ ra̱míjínʼ›.

Índo̱ rí guámbóo raʼthí Moisés, ku̱ba̱ʼ naguajan. Goʼwóo ga̱jma̱a̱ xúgíʼ rí gíʼdoo Coré, Datán, Abiram ga̱jma̱a̱ bi̱ kuwa náa ikhiin najpátuíʼíin náa awúu̱n ku̱ba̱ʼ, ikhú ku̱ba̱ʼ nagúguáa̱. Índo̱ rí xa̱bu̱ nudxawíín rí nundxaʼwaská xa̱bu̱ bi̱ najpátuíʼíin, nundxa̱ʼwa̱: ‹¡Agayálaʼ! ¡Mu xajpatuáʼáanʼlú mangáanʼ náa awúu̱n ku̱ba̱ʼ!›.

Coré gajmíi̱n 250 xa̱bi̱i̱ xóó kuwa mijngii náa tabernáculo. Ikha jngó Jeobá nakruígú aguʼ, ga̱jma̱a̱ naʼni rí xúgínʼ xa̱bu̱ mikhiin. Ikhú Jeobá naʼthúu̱n Eleazar a̱ʼdióo Aarón, rí mbayá tséjui̱i̱ náa rí narajkuáa incienso rí nijmún xa̱bu̱ bi̱ nikháñun mu maʼni mbá ajua̱nʼ mbawiʼ dí marugo ga̱jma̱a̱ náa altar. Ajua̱nʼ rí narugoo altar najmaa mu mbuyáá israelitas rí i̱ndó Aarón gajmíi̱n e̱ji̱i̱n gíʼmiin manindxu̱ún ndxajkun náa Jeobá.

Mú Jeobá nandoo masngájma májánʼ rí ikhaa ndiyáaʼ Aarón gajmíi̱n e̱ji̱i̱n mu manindxu̱ún ndxajkun. Ikha jngó naʼthúu̱n Moisés: ‹Rí mámbáa bi̱ ni̱ndxu̱u̱ xa̱bu̱ ede̱ náa xuajin ma̱jkha̱ʼ ndrígóo Israel ga̱ʼkha̱ kayóo ixu̱u̱. Rí náa xuajin ndrígóo Leví, Aarón bi̱ gáʼkha̱ kayóo ixu̱u̱. Ikhú atasngutámáʼ mámbá ixi̱ náa tabernáculo náa inu e̱jna̱ rí nimbánuu. Xa̱bu̱ bi̱ ndiʼyáaʼ ikhúúnʼ mani̱ndxu̱u̱ ndxajkun maxná ri̱ʼi̱ náa ixu̱u̱›.

Índo̱ Moisés ndaʼyoo i̱mba̱ néjtsuu, ¡náa ixu̱u̱ Aarón naxná ri̱ʼi̱ ga̱jma̱a̱ almendra niʼgo̱o̱! Rí xúgi̱, lá natayáá ikháánʼ náa numuu niʼni Jeobá rí maxná ri̱ʼi̱ náa ixu̱u̱ Aarón ráʼ.