39-нҗы хекая

Харуның гүллән хасасы

БУ ХАСАДАКЫ ачылан гүле ве етишен бадама серет. Бу Харуның хасасы. Олар бары-ёгы бир гиҗәниң ичинде Харуның хасасында пейда болды! Гел, мунуң нәме үчин бейле боланыны билели.

Ысрайыллылар бирнәче вагтлап чөлде гездилер. Оларың кәбирлери Муса ёлбашчы болмалы дәл, Харун болса баш руханы болмалы дәл диен пикирдеди. Корах, Датан, Абирам ве халка баштутанлык эдйән 250 саны адам хем шейле пикирдеди. Ол адамларың әхлиси Мусаның янына гелип, гахар билен: «Сиз нәме үчин өзүңизи бейлеки адамлардан ёкары тутярсыңыз?» диййәр.

Муса Кораха ве онуң тарапдарларына: «Эртир бухуры алып бухурданда гоюң. Соңра Ехованың чадырының янына барың, шонда Ехованың кими сайлаяндыгыны гөрерис» дийди.

Эртеси гүн Корах ве онуң 250 саны тарапдары хем-де олары голдаян бирнәче адамлар чадырың янына гелйәр. Ехова муңа гаты гахарланды. Муса халка: «Бу ярамаз адамларың чадырының янындан айрылың ве оларың затларыны эллемәң» дийип табшырды. Халк оңа гулак асып, Корахың, Датаның ве Абирамың чадырындан айрылды.

Соңра Муса: «Ер ачылып ярамаз адамлары ювдар. Шонда сиз Ехованың кими сайландыгыны билерсиңиз» диййәр.

Эдил шол вагт ер ачыляр. Корахың чадырыны, әхли задыны хем-де Датаны, Абирамы ве олары голдаянлары ер ювудяр. Халк ериң астына гидип барян адамларың агы сесини эшиденде гаты горкуп: «Гачалың! Ёгсам ер бизем ювдар!» диййәр.

Корах ве онуң 250 саны тарапдары энтегем чадырың янындадылар. Шонда Ехова гөкден от ягдыряр ве оларың бары өлйәр. Соңра Ехова Харуның оглы Элиязара, хеләк болан адамларың бухурданларыны алып, гурбан эдилйән ериң үстүни басырмак үчин юка демир бөлегини ясамагы табшыряр. Бу бассырма Харундан ве онуң огулларындан башга хич кимиң Ехова руханы болуп гуллук этмели дәлдигини ысрайыллылара ятлатмалыды.

Эмма Ехова Харуны ве онуң огулларыны хемишелик руханы сайландыгыны гөркезмек ислейәр. Шонуң үчин ол Муса: «Гой, Ысрайылың хер тайпасының баштутаны өз хасасыны гетирсин. Левилилер тайпасындан болса, Харун өз хасасыны гетирсин. Соңра бу хасалары чадырда әхт сандыгының өңүнде гой. Кими руханы эдип сайласам, шонуң хасасы гүлләр» дийип табшыряр.

Муса ирден гелип гөрсе, Харуның хасасы гүлләп миве гетирипдир! Сен инди Харуның хасасыны Ехованың нәме үчин гүлледендигине дүшүндиңми?

Санлар 16:1—49; 17:1—11; 26:10.