Makani 39: Nkoli ya Aloni Yasyuuka Maluba
LANGA maluba alimwi amaalumondi aapide kunkoli eeyi. Eeyi ninkoli ya Aloni. Maluba aaya amicelo eeyi iipide yakomena kunkoli ya Aloni mubuzuba buyo bomwe. Atubone ncocili boobo.
Lino kwaba ciindi cilamfwu bana Isilayeli kabaile kwiingaila munkanda. Bamwi bantu tabasyomi kuti Musa ulakonzya kuba musololi naa Aloni ikuba mupaizi mupati. Kola nguuyeeya boobo a Datani, a Abilamu alimwi abasololi bali 250. Boonse baboola akwaambila Musa kuti: ‘Nkaambo nzi ncolipa bupati kuli ndiswe?’
Musa waambila Kola abantu bakwe kuti: ‘Bwaca buyo mubweze zitentelo akubikka tununkilizyo muli nzinzyo. Mwamana muboole kucikombelo ca Jehova. Tuya kubona Jehova ngwaya kusala.’
Buzuba bwakaccilila, Kola abantu bakwe bali 250 basika kucikombelo. Alimwi kwaccilila abamwi ikuyumya-yumya bantu aaba. Jehova wakalala kapati! Musa wati: ‘Amuzwe kumatente aabantu aaba babi. Mutajati cintu cabo niciba comwe.’ Bantu baswiilila, eelyo bazwa kumatente aa Kola, Datani a Abilamu.
Kumane Musa wati: ‘Kwiinda muli ceeci cilaacitike mulazyiba Jehova ngwaasala. Nyika ilaasama akubamena aaba bantu babi.’
Mbwaamanina buyo Musa kwaamba, nyika yaasama. Tente lya Kola azintu zyakwe, Datani a Abilamu abaabo mbocakali limwi yabamena. Bantu nobamvwa kulila kwabaabo bamenwa, boongolola bati: ‘Twamana nobantu atuccije! Nyika inga yatumena andiswe!’
Kola abantu bakwe bali 250 baciimvwi munsi lyacikombelo. Aboobo Jehova watumya mulilo, alimwi boonse bapya. Kumane Jehova waambila Eliyaza mwana wa Aloni kubweza zitentelo zyabantu bafwa akupanga civwumbyo cuuba-uba cacipaililo. Eeci civwumbyo cacipaililo ncicenjezyo kubana Isilayeli kubazyibya kuti taku uumbi kuleka buyo Aloni abana bakwe weelede kuba mupaizi wa Jehova.
Pele Jehova uyanda kucisalazya kuti ngu Aloni abana bakwe mbaasala kuba bapaizi. Aboobo waambila Musa kuti: ‘Ambila musololi aumwi wamusyobo wa Isilayeli alete nkoli yakwe. Musyobo waba Levi, Aloni alete nguyo nkoli yakwe. Wamana ubikke nkoli aimwi kumpela lyabbokesi lyacizuminano. Nkoli yamuntu ngondasala kuba mupaizi ilasyuuka maluba.’
Musa alange nibwakaca, wakabona nkoli ya Aloni yasyuuka maluba amaalumondi aapide! Hena lino wacibona Jehova ncaakacitila kuti nkoli ya Aloni isyuuke maluba?
Myeelwe 16:1-49; 17:1-11; 26:10.
Mibuzyo
- Mbabaani bakazangila bweendelezi bwa Musa a Aloni, alimwi ncinzi ncibakaamba kuli Musa?
- Ncinzi Musa ncaakaambila Kola abantu bali 250 mbocakali limwi?
- Ncinzi Musa ncaakaamba kubantu, alimwi ncinzi cakacitika mbwaakamanina buyo kwaambaula?
- Ncinzi cakacitika kuli Kola akubantu mbocakali limwi bali 250?
- Mbuti Eliyaza alimwi abana ba Aloni mbobakacita kuzitentelo zyabantu bakafwa, alimwi nkaambo nzi?
- Nkaambo nzi Jehova ncaakapa kuti nkoli ya Aloni isyuuke maluba? (Bona acifwanikiso.)
Mibuzyo aimwi
- Bala Myeelwe 16:1-49.
Ncinzi ncaacita Kola abantu bakwe, alimwi nkaambo nzi nciyakali nzila yakuzangila Jehova? (My. 16:9, 10, 18; Lev. 10:1, 2; Tus. 11:2)
Nkuyeeya kutali kabotu kuli buti nkwaakaba ankuko Kola a “bapati babantu bankuta” bali 250? (Myeelwe 16:1-3, BT; Tus. 15:33; Is. 49:7)
- Bala Myeelwe 17:1-11 a 26:10.
Ino kwakali kutondezya nzi kusyuuka kwankoli ya Aloni, alimwi nkaambo nzi Jehova ncaakaambila kuti yeelede kuyobolwa mubbokesi? (My. 17:5, 8, 10)
Nciiyo nzi ciyandika ncotukonzya kwiiya kunkoli ya Aloni? (My. 17:10; Inc. 20:28; Flp. 2:14; Heb. 13:17)
Andiza Inga Mwaakkomanina Ayaaya
TUKKAADI TWAAMBA ZYABANTU BAMU BBAIBBELE
Kakkaadi Kamu Bbaibbele Kaamba Kujatikizya Aroni
Nkaambo nzi ncaatakazumizyigwa kunjila munyika yakasyomezyegwa?
