HI NGA wona a zitsangi ni maalmondi ma buvileko lezi zi hlukako ka nhonga leyi. Leyi i nhonga ya Aroni. A zitsangi lezi ni mihanzu leyi yi buvileko zi hlukile ka nhonga ya Aroni hi wusiku ginwe ntsena! A hi woneni a ku hikuyini.

A vaIsraeli vata va nzulanzula xiwuleni hi xikhati xo kari makunu. A vanhu vo kari a va pimisi lezaku Mosi i na ni fanelo ya kuva murangeli, kutani a ku Aroni i fanelwe hi kuva mupristi wa hombe. Kora munwe wa lava va pimisako lezo, zinwe na Datani, Abiramu ni 250 wa varangeli va vanhu. Vontlhe lavo vata ka Mosi va taku: ‘Hikuyini u ti vekako hehla ka hina ke?’

Mosi i byela Kora ni valanzeli vakwe ku ngalo: ‘Manziko ni mixo tekani zibya zo okela nzilo mu chela ka zona libani. Zonake muta ka tabernakeli ga Jehova. Hi ta zi wona a ku Jehova i ta hlawula mani.’

Hi manziko wa kona Kora ni 250 wa valanzeli vakwe vata ka tabernakeli. Vanwani vanhu vo tala vata a ku ta seketela vavanuna lavo. Jehova i zangarile nguvu. Mosi aku ngalo: ‘Humani ka matenda ya vavanuna lava vo biha. Mu nga henyi ni nchumu wunwe wu va lumbako.’ A vanhu va ingisa, va huma matendeni ya Kora, Datani na Abiramu.

Makunu Mosi i ngalo: ‘Hi ka lezi mu ta tiva loyi Jehova a mu hlawulileko. A misava yi ta ahlama yi mita vavanuna lava vo biha.’

Hi xalexo xikhati Mosi a mbhetako ku wulawula, a misava yi ahlama. A tenda ga Kora ni lezi zi mu lumbako na Datani na Abiramu zinwe ni lava va nga navo va relela, a misava yi va fenengeta. Loku a vanhu vazwa a tihuwa ta lava va wako nkeleni, va kanyuluka vaku: ‘A hi tsutsumeni! Hi nga mitiwa na hina hi misava!’

Kora ni 250 wa valanzeli vakwe va ha hi kusuhani ni tabernakeli. Kasike Jehova i rumela nzilo, vona vontlhe va hiswa. Makunu Jehova i byela Eliazare n’wana Aroni a ku teka a zibya zo okela nzilo za vavanuna lava va fileko a maha ziphambati za ku lemela hi zona a alati. A ziphambati lezo zi tava xialakanyiso ka va ka Israeli xa lezaku ni munwe ahandle ka Aroni ni vana vakwe i fanele ku tirela Jehova kota mupristi.

Kanilezi Jehova i lava ku dlunyatisa khwatsi lezaku i hlawulile Aroni ni vana vakwe akuva vapristi. Hizalezo yena i byela Mosi ku ngalo: ‘Ngha murangeli wa lixaka linwe ni linwani la ka Israeli a neha nhonga yakwe. Lomu lixakeni la Levi, ngha Aroni a neha a nhonga yakwe. Kasike veka yinwe ni yinwani ya tinhonga leto lomu ka tabernakeli mahlweni ka nghaxa ya xivumelwano. A nhonga ya wanuna loyi nzi mu hlawulileko kota mupristi yi ta hluka zitsangi.’

Loku Mosi a cuwuka ni mixo wa kona, languta, a nhonga ya Aroni yi na ni zitsangi lezi ni maalmondi ma buvileko zi hlukako ka yona! Wa zi wona makunu a ku hikuyini Jehova a hlukisileko zitsangi ka nhonga ya Aroni ke?