БО ыяшта, азы даянгыышта, частып келген чечектерни болгаш быжа берген миндальды көрем. Ол дээрге Ааро́ннуң даянгыыжы-дыр. Олар чүгле чаңгыс дүн дургузунда Ааро́ннуң даянгыыжынга тыпты берген! Чүге ындыг чүве болганыл, билип алыылам.

Изра́ильчилер элээн үе дургузунда ховуда азып чоруп турар. Моисе́й баштыңчы, а Ааро́н дээди бараалгакчы болбас ужурлуг деп, оларның чамдыызы бодап турар. Корей, Дафан, Авиро́н болгаш чоннуң 250 удуртукчулары ынчаар бодап турар. Шупту ол кижилер Моисе́йге келгеш: ‘Чүге силер бодуңарны бистен — арткан кижилерден — өрү көрүп турар силер?’ — деп хорадап эгелээннер.

Моисе́й Корейге болгаш ооң сүлчээчилеринге мынча деп дужааган: ‘Даарта алдын саваларга чаагай чыттыг чүүлдү каап алгаш келиңер. Оон Иегованың чадырының чанынче чедип келиңер. Иегова кымны шилип алыр эвес, көрүп көөр бис’.

Дараазында хүн Корей биле ооң 250 сүлчээчилери чадырга чедип келгеннер. Оларның талалакчылары болур өске хөй кижилер база чедип келген. Иегова дыка килеңнээн. ‘Ол өөдежок кижилерниң майгыннарындан ырадыр туруп алыңар. Оларның эт-севинге дегбеңер’,— деп, Моисе́й дужааган. Чон ооң сөстерин дыңнап, Корей, Дафан болгаш Авиро́ннуң майгыннарындан ырай берген.

Ооң соонда Моисе́й чарлаан: ‘Иегова кымны шилип алганын мынчаар билип алыр силер. Чер ажыттына бергеш, бо өөдежок кижилерни ажырыптар’.

Ол дораан чер ажыттына берген. Корейниң майгыны база бүгү өнчүзү, ол ышкаш Дафан, Авиро́н болгаш оларның шупту сүлчээчилери чер иштинче аңдарлы бээрге, чер оларның кырындан хагдына берген. Чон чер адаанче аңдарлып бар чыткан кижилерниң алгы-кышкызын дыңнааш, дендии коргуп: ‘Дезээлиңер! Оон башка чер бисти база ажырыптар!’ — дижип турган.

Корей болгаш ооң 250 сүлчээчилери ам-даа чадыр чанында. Ынчан Иегова оларже от чоргузуптарга, олар шупту өлүп калган. Ооң соонда Иегова Ааро́ннуң оглу Елеаза́рга, өлген кижилерниң алдын саваларын алгаш, оон тура өргүл салыр бедигээшти шывар чугажак алдын кылырын дужааган. Ол шывыг изра́ильчилерге, Ааро́н база ооң оолдарындан өске кым-даа Иегованың бараалгакчызы болбас ужурлуг деп, сагындырар ужурлуг.

Ынчалза-даа Иегова, Ааро́н база ооң оолдарын бараалгакчы кылдыр шилип алганын, кезээ мөңгеде тодазы-биле көргүзерин күзеп турар. Ынчангаш ол Моисе́йге дужааган: ‘Изра́ильдиң төрел бөлүк бүрүзүнүң баштыңы даянгыыжын эккелзин. А Левийниң төрел бөлүүнден Ааро́н бодунуң даянгыыжын эккелзин. Оон ол даянгыыштарны чадырга, дугуржулга-чагыгның хааржааның мурнунга салып каг. Кымны бараалгакчы кылдыр шилип алыр-дыр мен, ооң даянгыыжы частып кээр’. Моисе́й эртен эрте көөрү-биле чедип кээрге — Ааро́ннуң даянгыыжы частып келген база ында чимистер өзүп келген болган! Иегова чүү дээш Ааро́ннуң даянгыыжын частырын албадапкан, ам билип тур сен бе?